៣. តិកនិបាតោ

១. អបរាសាមាថេរីគាថា

៣៩. ‘‘បណ្ណវីសតិវស្សានិ, យតោ បព្ពជិតាយ មេ;

នាភិជានាមិ ចិត្តស្ស, សមំ លទ្ធំ កុទាចនំ.

៤០. ‘‘អលទ្ធា ចេតសោ សន្តិំ, ចិត្តេ អវសវត្តិនី;

តតោ សំវេគមាបាទិំ, សរិត្វា ជិនសាសនំ.

៤១. ‘‘ពហូហិ ទុក្ខធម្មេហិ, អប្បមាទរតាយ មេ;

តណ្ហក្ខយោ អនុប្បត្តោ, កតំ ពុទ្ធស្ស សាសនំ;

អជ្ជ មេ សត្តមី រត្តិ, យតោ តណ្ហា វិសោសិតា’’តិ.

… អបរា សាមា ថេរី….

២. ឧត្តមាថេរីគាថា

៤២. ‘‘ចតុក្ខត្តុំ បញ្ចក្ខត្តុំ, វិហារា ឧបនិក្ខមិំ;

អលទ្ធា ចេតសោ សន្តិំ, ចិត្តេ អវសវត្តិនី.

៤៣. ‘‘សា ភិក្ខុនិំ ឧបគច្ឆិំ, យា មេ សទ្ធាយិកា អហុ;

សា មេ ធម្មមទេសេសិ, ខន្ធាយតនធាតុយោ.

៤៤. ‘‘តស្សា ធម្មំ សុណិត្វាន, យថា មំ អនុសាសិ សា;

សត្តាហំ ឯកបល្លង្កេន, និសីទិំ បីតិសុខសមប្បិតា [និសីទិំ សុខសមប្បិតា (សី.)];

អដ្ឋមិយា បាទេ បសារេសិំ, តមោខន្ធំ បទាលិយា’’តិ.

… ឧត្តមា ថេរី….

៣. អបរាឧត្តមាថេរីគាថា

៤៥. ‘‘យេ ឥមេ សត្ត ពោជ្ឈង្គា, មគ្គា និព្ពានបត្តិយា;

ភាវិតា តេ មយា សព្ពេ, យថា ពុទ្ធេន ទេសិតា.

៤៦. ‘‘សុញ្ញតស្សានិមិត្តស្ស, លាភិនីហំ យទិច្ឆកំ;

ឱរសា ធីតា ពុទ្ធស្ស, និព្ពានាភិរតា សទា.

៤៧. ‘‘សព្ពេ កាមា សមុច្ឆិន្នា, យេ ទិព្ពា យេ ច មានុសា;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

… អបរា ឧត្តមា ថេរី….

៤. ទន្តិកាថេរីគាថា

៤៨. ‘‘ទិវាវិហារា និក្ខម្ម, គិជ្ឈកូដម្ហិ បព្ពតេ;

នាគំ ឱគាហមុត្តិណ្ណំ, នទីតីរម្ហិ អទ្ទសំ.

៤៩. ‘‘បុរិសោ អង្កុសមាទាយ, ‘ទេហិ បាទ’ន្តិ យាចតិ;

នាគោ បសារយី បាទំ, បុរិសោ នាគមារុហិ.

៥០. ‘‘ទិស្វា អទន្តំ ទមិតំ, មនុស្សានំ វសំ គតំ;

តតោ ចិត្តំ សមាធេសិំ, ខលុ តាយ វនំ គតា’’តិ.

… ទន្តិកា ថេរី….

៥. ឧព្ពិរិថេរីគាថា

៥១. ‘‘អម្ម ជីវាតិ វនម្ហិ កន្ទសិ, អត្តានំ អធិគច្ឆ ឧព្ពិរិ;

ចុល្លាសីតិសហស្សានិ [ចូឡាសីតិសហស្សានិ (សី.)], សព្ពា ជីវសនាមិកា;

ឯតម្ហាឡាហនេ ទឌ្ឍា, តាសំ កមនុសោចសិ.

៥២. ‘‘អព្ពហី [អព្ពុតី (ស្យា.), អព្ពុឡ្ហំ (ក.)] វត មេ សល្លំ, ទុទ្ទសំ ហទយស្សិតំ [ហទយនិស្សិតំ (សី. ស្យា.)];

យំ មេ សោកបរេតាយ, ធីតុសោកំ ព្យបានុទិ.

៥៣. ‘‘សាជ្ជ អព្ពូឡ្ហសល្លាហំ, និច្ឆាតា បរិនិព្ពុតា;

ពុទ្ធំ ធម្មញ្ច សង្ឃញ្ច, ឧបេមិ សរណំ មុនិ’’ន្តិ.

… ឧព្ពិរី ថេរី….

៦. សុក្កាថេរីគាថា

៥៤. ‘‘កិំមេ កតា រាជគហេ មនុស្សា, មធុំ បីតាវ [មធុបីតាវ (សី.)] អច្ឆរេ;

យេ សុក្កំ ន ឧបាសន្តិ, ទេសេន្តិំ ពុទ្ធសាសនំ.

៥៥. ‘‘តញ្ច អប្បដិវានីយំ, អសេចនកមោជវំ;

បិវន្តិ មញ្ញេ សប្បញ្ញា, វលាហកមិវទ្ធគូ.

៥៦. ‘‘សុក្កា សុក្កេហិ ធម្មេហិ, វីតរាគា សមាហិតា;

ធារេតិ អន្តិមំ ទេហំ, ជេត្វា មារំ សវាហន’’ន្តិ.

… សុក្កា ថេរី….

៧. សេលាថេរីគាថា

៥៧. ‘‘នត្ថិ និស្សរណំ លោកេ, កិំ វិវេកេន កាហសិ;

ភុញ្ជាហិ កាមរតិយោ, មាហុ បច្ឆានុតាបិនី’’.

៥៨. ‘‘សត្តិសូលូបមា កាមា, ខន្ធាសំ អធិកុដ្ដនា;

យំ ត្វំ ‘កាមរតិំ’ ព្រូសិ, ‘អរតី’ ទានិ សា មម.

៥៩. ‘‘សព្ពត្ថ វិហតា នន្ទី [នន្ទិ (សី. ស្យា.)], តមោខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តកា’’តិ.

… សេលា ថេរី….

៨. សោមាថេរីគាថា

៦០. ‘‘យំ តំ ឥសីហិ បត្តព្ពំ, ឋានំ ទុរភិសម្ភវំ;

ន តំ ទ្វង្គុលបញ្ញាយ, សក្កា បប្បោតុមិត្ថិយា’’.

៦១. ‘‘ឥត្ថិភាវោ នោ កិំ កយិរា, ចិត្តម្ហិ សុសមាហិតេ;

ញាណម្ហិ វត្តមានម្ហិ, សម្មា ធម្មំ វិបស្សតោ.

៦២. ‘‘សព្ពត្ថ វិហតា នន្ទី, តមោខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តកា’’តិ.

… សោមា ថេរី….

តិកនិបាតោ និដ្ឋិតោ.