១២. ធម្មទិន្នាថេរីគាថា

១២. ‘‘ឆន្ទជាតា អវសាយី, មនសា ច ផុដា [ផុដ្ឋា (ស្យា.), ផុឋា (សី. អដ្ឋ.)] សិយា;

កាមេសុ អប្បដិពទ្ធចិត្តា [អប្បដិពន្ធចិត្តា (ក.)], ឧទ្ធំសោតាតិ វុច្ចតី’’តិ [ឧទ្ធំសោតា វិមុច្ចតីតិ (សី. បី.)].

… ធម្មទិន្នា ថេរី….

១៣. ‘‘ករោថ ពុទ្ធសាសនំ, យំ កត្វា នានុតប្បតិ;

ខិប្បំ បាទានិ ធោវិត្វា, ឯកមន្តេ និសីទថា’’តិ.

… វិសាខា ថេរី….

១៤. ‘‘ធាតុយោ ទុក្ខតោ ទិស្វា, មា ជាតិំ បុនរាគមិ;

ភវេ ឆន្ទំ វិរាជេត្វា, ឧបសន្តា ចរិស្សសី’’តិ.

… សុមនា ថេរី….