៥. សុក្កាថេរីអបទានំ

១១១. ‘‘ឯកនវុតិតោ កប្បេ, វិបស្សី នាម នាយកោ;

ឧប្បជ្ជិ ចារុទស្សនោ, សព្ពធម្មវិបស្សកោ.

១១២. ‘‘តទាហំ ពន្ធុមតិយំ, ជាតា អញ្ញតរេ កុលេ;

ធម្មំ សុត្វាន មុនិនោ, បព្ពជិំ អនគារិយំ.

១១៣. ‘‘ពហុស្សុតា ធម្មធរា, បដិភានវតី តថា;

វិចិត្តកថិកា ចាបិ, ជិនសាសនការិកា.

១១៤. ‘‘តទា ធម្មកថំ កត្វា, ហិតាយ ជនតំ ពហុំ [ជនតាយ ហិតំ ពហុំ (សី.) … សទា (ស្យា.), ហិតាយ ជនសំសរិំ (បី.)];

តតោ ចុតាហំ តុសិតំ, ឧបបន្នា យសស្សិនី.

១១៥. ‘‘ឯកតិំសេ ឥតោ កប្បេ, សិខី វិយ សិខី ជិនោ;

តបន្តោ យសសា លោកេ [លោកំ (ស្យា. បី.)], ឧប្បជ្ជិ វទតំ វរោ.

១១៦. ‘‘តទាបិ បព្ពជិត្វាន, ពុទ្ធសាសនកោវិទា;

ជោតេត្វា ជិនវាក្យានិ, តតោបិ តិទិវំ គតា.

១១៧. ‘‘ឯកតិំសេវ កប្បម្ហិ, វេស្សភូ នាម នាយកោ;

ឧប្បជ្ជិត្ថ មហាញាណី, តទាបិ ច តថេវហំ.

១១៨. ‘‘បព្ពជិត្វា ធម្មធរា, ជោតយិំ ជិនសាសនំ;

គន្ត្វា មរុបុរំ រម្មំ, អនុភោសិំ មហាសុខំ.

១១៩. ‘‘ឥមម្ហិ ភទ្ទកេ កប្បេ, កកុសន្ធោ ជិនុត្តមោ;

ឧប្បជ្ជិ នរសរណោ [នរសទ្ទូលោ (សី. ស្យា. បី.)], តទាបិ ច តថេវហំ.

១២០. ‘‘បព្ពជិត្វា មុនិមតំ, ជោតយិត្វា យថាយុកំ;

តតោ ចុតាហំ តិទិវំ, អគំ សភវនំ យថា.

១២១. ‘‘ឥមស្មិំយេវ កប្បម្ហិ, កោណាគមននាយកោ;

ឧប្បជ្ជិ លោកសរណោ, អរណោ អមតង្គតោ [វទតំ វរោ, សព្ពសត្តានមុត្តមោ (ស្យា.)].

១២២. ‘‘តទាបិ បព្ពជិត្វាន, សាសនេ តស្ស តាទិនោ;

ពហុស្សុតា ធម្មធរា, ជោតយិំ ជិនសាសនំ.

១២៣. ‘‘ឥមស្មិំយេវ កប្បម្ហិ, កស្សបោ មុនិមុត្តមោ;

ឧប្បជ្ជិ លោកសរណោ, អរណោ មរណន្តគូ.

១២៤. ‘‘តស្សាបិ នរវីរស្ស, បព្ពជិត្វាន សាសនេ;

បរិយាបុដសទ្ធម្មា, បរិបុច្ឆាវិសារទា.

១២៥. ‘‘សុសីលា លជ្ជិនី ចេវ, តីសុ សិក្ខាសុ កោវិទា;

ពហុំ ធម្មកថំ កត្វា, យាវជីវំ មហាមុនេ.

១២៦. ‘‘តេន កម្មវិបាកេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១២៧. ‘‘បច្ឆិមេ ច ភវេ ទានិ, គិរិព្ពជបុរុត្តមេ;

ជាតា សេដ្ឋិកុលេ ផីតេ, មហារតនសញ្ចយេ.

១២៨. ‘‘យទា ភិក្ខុសហស្សេន, បរិវុតោ លោកនាយកោ;

ឧបាគមិ រាជគហំ, សហស្សក្ខេន វណ្ណិតោ.

១២៩. ‘‘‘ទន្តោ ទន្តេហិ សហ បុរាណជដិលេហិ, វិប្បមុត្តោ វិប្បមុត្តេហិ;

សិង្គីនិក្ខសវណ្ណោ, រាជគហំ បាវិសិ ភគវា’.

១៣០. ‘‘ទិស្វា ពុទ្ធានុភាវំ តំ, សុត្វាវ គុណសញ្ចយំ;

ពុទ្ធេ ចិត្តំ បសាទេត្វា, បូជយិំ តំ យថាពលំ.

១៣១. ‘‘អបរេន ច កាលេន, ធម្មទិន្នាយ សន្តិកេ;

អគារា និក្ខមិត្វាន, បព្ពជិំ អនគារិយំ.

១៣២. ‘‘កេសេសុ ឆិជ្ជមានេសុ, កិលេសេ ឈាបយិំ អហំ;

ឧគ្គហិំ សាសនំ សព្ពំ, បព្ពជិត្វាចិរេនហំ.

១៣៣. ‘‘តតោ ធម្មមទេសេសិំ, មហាជនសមាគមេ;

ធម្មេ ទេសិយមានម្ហិ, ធម្មាភិសមយោ អហុ.

១៣៤. ‘‘នេកបាណសហស្សានំ, តំ វិទិត្វាតិវិម្ហិតោ;

អភិប្បសន្នោ មេ យក្ខោ, ភមិត្វាន គិរិព្ពជំ.

១៣៥. ‘‘កិំ មេ កតា រាជគហេ មនុស្សា, មធុំ បីតាវ អច្ឆរេ;

យេ សុក្កំ ន ឧបាសន្តិ, ទេសេន្តិំ អមតំ បទំ.

១៣៦. ‘‘តញ្ច អប្បដិវានីយំ, អសេចនកមោជវំ;

បិវន្តិ មញ្ញេ សប្បញ្ញា, វលាហកមិវទ្ធគូ.

១៣៧. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនេ.

១៣៨. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

១៣៩. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មម មហាវីរ, ឧប្បន្នំ តវ សន្តិកេ.

១៤០. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១៤១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ សុក្កា ភិក្ខុនី ឥមា គាថាយោ អភាសិត្ថាតិ.

សុក្កាថេរិយាបទានំ បញ្ចមំ.

បញ្ចមំ ភាណវារំ.