៦. អភិរូបនន្ទាថេរីអបទានំ

១៤៣. ‘‘ឯកនវុតិតោ កប្បេ, វិបស្សី នាម នាយកោ;

ឧប្បជ្ជិ ចារុទស្សនោ, សព្ពធម្មេសុ ចក្ខុមា.

១៤៤. ‘‘តទាហំ ពន្ធុមតិយំ, ឥទ្ធេ ផីតេ មហាកុលេ;

ជាតា សុរូបា ទយិតា, បូជនីយា ជនស្ស ច.

១៤៥. ‘‘ឧបគន្ត្វា មហាវីរំ, វិបស្សិំ លោកនាយកំ;

ធម្មំ សុណិត្វា សរណំ, ឧបេសិំ នរនាយកំ.

១៤៦. ‘‘សីលេសុ សំវុតា ហុត្វា, និព្ពុតេ ច នរុត្តមេ;

ធាតុថូបស្ស ឧបរិ, សោណ្ណច្ឆត្តមបូជយិំ.

១៤៧. ‘‘មុត្តចាគា សីលវតី, យាវជីវំ តតោ ចុតា;

ជហិត្វា មានុសំ ទេហំ, តាវតិំសូបគា អហំ.

១៤៨. ‘‘តទា ទសហិ ឋានេហិ, អធិភោត្វាន សេសកេ [អធិភោត្វា អសេសតោ (ស្យា.)];

រូបសទ្ទេហិ គន្ធេហិ, រសេហិ ផុសនេហិ ច.

១៤៩. ‘‘អាយុនាបិ ច វណ្ណេន, សុខេន យសសាបិ ច;

តថេវាធិបតេយ្យេន, អធិគយ្ហ វិរោចហំ.

១៥០. ‘‘បច្ឆិមេ ច ភវេ ទានិ, ជាតាហំ កបិលវ្ហយេ;

ធីតា ខេមកសក្កស្ស, នន្ទា នាមាតិ វិស្សុតា.

១៥១. ‘‘អភិរូបសម្បទម្បិ [អភិរុបំ ឧបបទំ (សី.), អភិរុបំ ឧប្បាទំ (បី.)], អហុ មេ កន្តិសូចកំ;

យទាហំ យោព្ពនប្បត្តា, រូបលាវញ្ញភូសិតា.

១៥២. ‘‘តទា [តទា មមត្ថំ (សី.), ឥធ មមត្តេ (ស្យា. ក.)] មត្ថេ សក្យានំ, វិវាទោ សុមហា អហុ;

បព្ពាជេសិ តតោ តាតោ, មា សក្យា វិនស្សិំសុតិ.

១៥៣. ‘‘បព្ពជិត្វា តថាគតំ, រូបទេស្សិំ នរុត្តមំ;

សុត្វាន នោបគច្ឆាមិ, មម រូបេន គព្ពិតា.

១៥៤. ‘‘ឱវាទម្បិ ន គច្ឆាមិ, ពុទ្ធទស្សនភីរុតា;

តទា ជិនោ ឧបាយេន, ឧបនេត្វា សសន្តិកំ.

១៥៥. ‘‘តិស្សិត្ថិយោ [តិស្សោ ថីយោ (សី. បី.)] និទស្សេសិ, ឥទ្ធិយា មគ្គកោវិទោ;

អច្ឆរារូបសទិសំ, តរុណិំ ជរិតំ [ជរិកំ (ស្យា. ក.)] មតំ.

១៥៦. ‘‘តាយោ ទិស្វា សុសំវិគ្គា, វិរត្តាសេ កឡេវរេ;

អដ្ឋាសិំ ភវនិព្ពិន្ទា, តទា មំ អាហ នាយកោ.

១៥៧. ‘‘‘អាតុរំ អសុចិំ បូតិំ, បស្ស នន្ទេ សមុស្សយំ;

ឧគ្ឃរន្តំ បគ្ឃរន្តំ, ពាលានំ អភិនន្ទិតំ.

១៥៨. ‘‘‘អសុភាយ ចិត្តំ ភាវេហិ, ឯកគ្គំ សុសមាហិតំ;

យថា ឥទំ តថា ឯតំ, យថា ឯតំ តថា ឥទំ.

១៥៩. ‘‘‘ឯវមេតំ អវេក្ខន្តី, រត្តិន្ទិវមតន្ទិតា;

តតោ សកាយ បញ្ញាយ, អភិនិព្ពិជ្ឈ វច្ឆសិ’.

១៦០. ‘‘តស្សា មេ អប្បមត្តាយ, វិចរន្តិយា [វិចរន្ត្វាធ (សី.), វិចិនន្តីធ (ស្យា. បី.)] យោនិសោ;

យថាភូតំ អយំ កាយោ, ទិដ្ឋោ សន្តរពាហិរោ.

១៦១. ‘‘អថ និព្ពិន្ទហំ កាយេ, អជ្ឈត្តញ្ច វិរជ្ជហំ;

អប្បមត្តា វិសំយុត្តា, ឧបសន្តាម្ហិ និព្ពុតា.

១៦២. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនេ.

១៦៣. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

១៦៤. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មម មហាវីរ, ឧប្បន្នំ តវ សន្តិកេ.

១៦៥. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១៦៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៦៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អភិរូបនន្ទា ភិក្ខុនី ឥមា គាថាយោ អភាសិត្ថាតិ.

អភិរូបនន្ទាថេរិយាបទានំ ឆដ្ឋំ.