៤. សិង្គាលមាតុថេរីអបទានំ

៨២. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៨៣. ‘‘តទាហំ ហំសវតិយំ, ជាតាមច្ចកុលេ អហុំ;

នានារតនបជ្ជោតេ, ឥទ្ធេ ផីតេ មហទ្ធនេ.

៨៤. ‘‘បិតុនា សហ គន្ត្វាន, មហាជនបុរក្ខតា;

ធម្មំ ពុទ្ធស្ស សុត្វាន, បព្ពជិំ អនគារិយំ.

៨៥. ‘‘បព្ពជិត្វាន កាយេន, បាបកម្មំ វិវជ្ជយិំ;

វចីទុច្ចរិតំ ហិត្វា, អាជីវំ បរិសោធយិំ.

៨៦. ‘‘ពុទ្ធេ បសន្នា ធម្មេ ច, សង្ឃេ ច តិព្ពគារវា;

សទ្ធម្មស្សវនេ យុត្តា, ពុទ្ធទស្សនលាលសា [ពុទ្ធទស្សនសាលយា (ស្យា.)].

៨៧. ‘‘អគ្គំ សទ្ធាធិមុត្តានំ, អស្សោសិំ ភិក្ខុនិំ តទា;

តំ ឋានំ បត្ថយិត្វាន, តិស្សោ សិក្ខា អបូរយិំ.

៨៨. ‘‘តតោ មំ សុគតោ អាហ, ករុណានុគតាសយោ;

‘យស្ស សទ្ធា តថាគតេ, អចលា សុប្បតិដ្ឋិតា;

សីលញ្ច យស្ស កល្យាណំ, អរិយកន្តំ បសំសិតំ.

៨៩. ‘‘‘សង្ឃេ បសាទោ យស្សត្ថិ, ឧជុភូតញ្ច ទស្សនំ;

អទលិទ្ទោតិ តំ អាហុ, អមោឃំ តស្ស ជីវិតំ.

៩០. ‘‘‘តស្មា សទ្ធញ្ច សីលញ្ច, បសាទំ ធម្មទស្សនំ;

អនុយុញ្ជេថ មេធាវី, សរំ ពុទ្ធាន [ពុទ្ធានុសាសនំ (សី.), ពុទ្ធានំ សាសនំ (ស្យា.)] សាសនំ’.

៩១. ‘‘តំ សុត្វាហំ បមុទិតា, អបុច្ឆិំ បណិធិំ មម;

តទា អនោមោ អមិតោ, ព្យាករិត្ថ វិនាយកោ;

‘ពុទ្ធេ បសន្នា កល្យាណី, លច្ឆសេ តំ សុបត្ថិតំ.

៩២. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៩៣. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

សិង្គាលកស្ស [សិគាលកស្ស (សី. បី.)] មាតាតិ, ហេស្សតិ សត្ថុ សាវិកា’.

៩៤. ‘‘តំ សុត្វា មុទិតា ហុត្វា, យាវជីវំ តទា ជិនំ;

មេត្តចិត្តា បរិចរិំ, បដិបត្តីហិ នាយកំ.

៩៥. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៩៦. ‘‘បច្ឆិមេ ច ភវេ ទានិ, គិរិព្ពជបុរុត្តមេ;

ជាតា សេដ្ឋិកុលេ ផីតេ, មហារតនសញ្ចយេ.

៩៧. ‘‘បុត្តោ សិង្គាលកោ នាម, មមាសិ វិបថេ រតោ;

ទិដ្ឋិគហនបក្ខន្ទោ, ទិសាបូជនតប្បរោ.

៩៨. ‘‘នានាទិសា នមស្សន្តំ [នមស្សតិ (ស្យា.)], បិណ្ឌាយ នគរំ វជំ;

តំ ទិស្វា ឱវទី ពុទ្ធោ, មគ្គេ ឋត្វា វិនាយកោ.

៩៩. ‘‘តស្ស ទេសយតោ ធម្មំ, បនាទោ វិម្ហយោ អហុ;

ទ្វេកោដិនរនារីនំ, ធម្មាភិសមយោ អហុ.

១០០. ‘‘តទាហំ បរិសំ គន្ត្វា, សុត្វា សុគតភាសិតំ;

សោតាបត្តិផលំ បត្តា, បព្ពជិំ អនគារិយំ.

១០១. ‘‘ន ចិរេនេវ កាលេន, ពុទ្ធទស្សនលាលសា;

អនុស្សតិំ តំ ភាវេត្វា, អរហត្តមបាបុណិំ.

១០២. ‘‘ទស្សនត្ថាយ ពុទ្ធស្ស, សព្ពទា ច វជាមហំ;

អតិត្តាយេវ បស្សាមិ, រូបំ នយននន្ទនំ.

១០៣. ‘‘សព្ពបារមិសម្ភូតំ, លក្ខីនិលយនំ វរំ;

រូបំ សព្ពសុភាកិណ្ណំ, អតិត្តា វិហរាមហំ.

១០៤. ‘‘ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ;

សិង្គាលកស្ស យា មាតា, អគ្គា សទ្ធាធិមុត្តិកា [សំឃវិមុត្តិកា (បី.), មមាធិមុត្តិកា (ក.)].

១០៥. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនិ.

១០៦. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

១០៧. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មម មហាវីរ, ឧប្បន្នំ តវ សន្តិកេ.

១០៨. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១០៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ សិង្គាលមាតា ភិក្ខុនី ឥមា គាថាយោ អភាសិត្ថាតិ.

សិង្គាលមាតុថេរិយាបទានំ ចតុត្ថំ.