៣. ឧប្បលទាយិកាថេរីអបទានំ

៥៧. ‘‘នគរេ អរុណវតិយា, អរុណោ នាម ខត្តិយោ;

តស្ស រញ្ញោ អហុំ ភរិយា, ឯកជ្ឈំ ចារយាមហំ.

៥៨. ‘‘រហោគតា និសីទិត្វា, ឯវំ ចិន្តេសហំ តទា;

‘កុសលំ មេ កតំ នត្ថិ, អាទាយ គមិយំ មម.

៥៩. ‘‘‘មហាភិតាបំ កដុកំ, ឃោររូបំ សុទារុណំ;

និរយំ នូន គច្ឆាមិ, ឯត្ថ មេ នត្ថិ សំសយោ’.

៦០. ‘‘ឯវាហំ ចិន្តយិត្វាន, បហំសេត្វាន មានសំ;

រាជានំ ឧបគន្ត្វាន, ឥទំ វចនមព្រវិំ.

៦១. ‘‘‘ឥត្ថី នាម មយំ ទេវ, បុរិសានិត្តរា អហុ [បុរិសានុគតា សទា (សី.), បុរិសា ន ភវាម នោ (ស្យា.), បុរិសានំ ភរា មយំ (បី.)];

ឯកំ មេ សមណំ ទេហិ, ភោជយិស្សាមិ ខត្តិយ’.

៦២. ‘‘អទាសិ មេ តទា រាជា, សមណំ ភាវិតិន្ទ្រិយំ;

តស្ស បត្តំ គហេត្វាន, បរមន្នេន បូរយិំ.

៦៣. ‘‘បូរេត្វា បរមំ អន្នំ, សហ សុគន្ធលេបនំ;

មហាចេលេន ឆាទិត្វា, អទាសិំ តុដ្ឋមានសា.

៦៤. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៦៥. ‘‘សហស្សទេវរាជូនំ, មហេសិត្តមការយិំ;

សហស្សចក្កវត្តីនំ, មហេសិត្តមការយិំ.

៦៦. ‘‘បទេសរជ្ជំ វិបុលំ, គណនាតោ អសង្ខិយំ;

នានាវិធំ ពហុំ អញ្ញំ, តស្ស កម្មផលំ តតោ.

៦៧. ‘‘ឧប្បលស្សេវ មេ វណ្ណោ, អភិរូបា សុទស្សនា;

ឥត្ថិសព្ពង្គសម្បន្នា, អភិជាតា ជុតិន្ធរា.

៦៨. ‘‘បច្ឆិមេ ភវេ សម្បត្តេ, អជាយិំ សាកិយេ កុលេ;

នារីសហស្សបាមោក្ខា, សុទ្ធោទនសុតស្សហំ.

៦៩. ‘‘និព្ពិន្ទិត្វា អគារេហំ, បព្ពជិំ អនគារិយំ;

សត្តមីរត្តិសម្បត្តា [សត្តមិំរត្តិមបត្តា (សី. ស្យា. បី.)], ចតុសច្ចមបាបុណិំ.

៧០. ‘‘ចីវរំ បិណ្ឌបាតញ្ច, បច្ចយំ សយនាសនំ;

បរិមេតុំ ន សក្កោមិ, បិណ្ឌបាតស្សិទំ ផលំ.

៧១. ‘‘យំ មយ្ហំ បូរិតំ កម្មំ, កុសលំ សរសេ មុនិ;

តុយ្ហត្ថាយ មហាវីរ, បរិចត្តំ ពហុំ មយា.

៧២. ‘‘ឯកត្តិំសេ ឥតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បិណ្ឌបាតស្សិទំ ផលំ.

៧៣. ‘‘ទ្វេ គតិយោ បជានាមិ, ទេវត្តំ អថ មានុសំ;

អញ្ញំ គតិំ ន ជានាមិ, បិណ្ឌបាតស្សិទំ ផលំ.

៧៤. ‘‘ឧច្ចេ កុលេ បជាយាមិ, មហាសាលេ [តយោ សាល (ក.)] មហទ្ធនេ;

អញ្ញេ កុលេ ន ជាយាមិ, បិណ្ឌបាតស្សិទំ ផលំ.

៧៥. ‘‘ភវាភវេ សំសរិត្វា, សុក្កមូលេន ចោទិតា;

អមនាបំ ន បស្សាមិ, សោមនស្សកតំ ផលំ.

៧៦. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនេ.

៧៧. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

៧៨. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មម មហាវីរ, ឧប្បន្នំ តវ សន្តិកេ.

៧៩. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៨០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ឧប្បលទាយិកា ភិក្ខុនី ភគវតោ សម្មុខា ឥមា គាថាយោ អភាសិត្ថាតិ.

ឧប្បលទាយិកាថេរិយាបទានំ តតិយំ.