១០. បេសលាថេរីអបទានំ

២២០. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

២២១. ‘‘សាវត្ថិយំ បុរេ វរេ, ឧបាសកកុលេ អហំ;

បសូតា តំ [នំ (ស្យា.)] ជិនវរំ, ទិស្វា សុត្វា ច ទេសនំ.

២២២. ‘‘តំ វីរំ សរណំ គន្ត្វា, សីលានិ ច សមាទិយិំ;

កទាចិ សោ មហាវីរោ, មហាជនសមាគមេ.

២២៣. ‘‘អត្តនោ អភិសម្ពោធិំ, បកាសេសិ នរាសភោ;

អននុស្សុតធម្មេសុ, បុព្ពេ ទុក្ខាទិកេសុ ច.

២២៤. ‘‘ចក្ខុ ញាណញ្ច បញ្ញា ច, វិជ្ជាលោកោ ច អាសិ មេ;

តំ សុត្វា ឧគ្គហេត្វាន, បរិបុច្ឆិញ្ច ភិក្ខវោ.

២២៥. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២២៦. ‘‘បច្ឆិមេ ច ភវេ ទានិ, ជាតា សេដ្ឋិមហាកុលេ;

ឧបេច្ច ពុទ្ធំ សទ្ធម្មំ, សុត្វា សច្ចូបសំហិតំ.

២២៧. ‘‘បព្ពជិត្វាចិរេនេវ, សច្ចត្ថានិ [សព្ពត្ថានិ (ស្យា. ក.)] វិចិន្តយំ;

ខេបេត្វា អាសវេ សព្ពេ, អរហត្តមបាបុណិំ.

២២៨. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

ចេតោបរិយញាណស្ស, វសី ហោមិ មហាមុនេ.

២២៩. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

២៣០. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មេ វិមលំ សុទ្ធំ, ពុទ្ធសេដ្ឋស្ស វាហសា.

២៣១. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគីវ ពន្ធនំ ឆេត្វា, វិហរាមិ អនាសវា.

២៣២. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

២៣៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ បេសលា [សេលា (ស្យា. បី.)] ភិក្ខុនី ឥមា គាថាយោ អភាសិត្ថាតិ.

បេសលាថេរិយាបទានំ ទសមំ.

ខត្តិយាវគ្គោ ចតុត្ថោ.