១០. យសោធរាបមុខអដ្ឋារសភិក្ខុនីសហស្សអបទានំ

៤២៦. ‘‘អដ្ឋារសសហស្សានិ, ភិក្ខុនី សក្យសម្ភវា;

យសោធរាបមុខានិ, សម្ពុទ្ធំ ឧបសង្កមុំ.

៤២៧. ‘‘អដ្ឋារសសហស្សានិ, សព្ពា ហោន្តិ មហិទ្ធិកា;

វន្ទន្តី មុនិនោ បាទេ, អារោចេន្តិ យថាពលំ.

៤២៨. ‘‘‘ជាតិ ខីណា ជរា ព្យាធិ, មរណញ្ច មហាមុនិ;

អនាសវំ បទំ សន្តំ, អមតំ យាម នាយក.

៤២៩. ‘‘‘ខលិតញ្ចេ បុរេ អត្ថិ, សព្ពាសម្បិ មហាមុនិ;

អបរាធមជានន្តី, ខម អម្ហំ វិនាយក.

៤៣០. ‘‘‘ឥទ្ធិញ្ចាបិ និទស្សេថ, មម សាសនការិកា;

បរិសានញ្ច សព្ពាសំ, កង្ខំ ឆិន្ទថ យាវតា.

៤៣១. ‘‘‘យសោធរា មហាវីរ, មនាបា បិយទស្សនា;

សព្ពា តុយ្ហំ មហាវីរ, អគារស្មិំ បជាបតិ.

៤៣២. ‘‘‘ថីនំ សតសហស្សានំ, នវុតីនំ ឆទុត្តរិ;

អគារេ តេ មយំ វីរ, បាមោក្ខា សព្ពា ឥស្សរា.

៤៣៣. ‘‘‘រូបាចារគុណូបេតា, យោព្ពនដ្ឋា បិយំវទា;

សព្ពា នោ អបចាយន្តិ, ទេវតា វិយ មានុសា.

៤៣៤. ‘‘‘អដ្ឋារសសហស្សានិ, សព្ពា សាកិយសម្ភវា;

យសោធរាសហស្សានិ, បាមោក្ខា ឥស្សរា តទា.

៤៣៥. ‘‘‘កាមធាតុមតិក្កម្ម, សណ្ឋិតា រូបធាតុយា;

រូបេន សទិសា នត្ថិ, សហស្សានំ មហាមុនិ.

៤៣៦. ‘‘‘សម្ពុទ្ធំ អភិវាទេត្វា, ឥទ្ធិំ ទស្សំសុ សត្ថុនោ;

នេកា នានាវិធាការា, មហាឥទ្ធីបិ ទស្សយុំ.

៤៣៧. ‘‘‘ចក្កវាឡសមំ កាយំ, សីសំ ឧត្តរតោ កុរុ;

ឧភោ បក្ខា ទុវេ ទីបា, ជម្ពុទីបំ សរីរតោ.

៤៣៨. ‘‘‘ទក្ខិណញ្ច សរំ បិញ្ឆំ, នានាសាខា តុ បត្តកា;

ចន្ទញ្ច សូរិយញ្ចក្ខិ, មេរុបព្ពតតោ សិខំ.

៤៣៩. ‘‘‘ចក្កវាឡគិរិំ តុណ្ឌំ, ជម្ពុរុក្ខំ សមូលកំ;

ពីជមានា ឧបាគន្ត្វា, វន្ទន្តី លោកនាយកំ.

៤៤០. ‘‘‘ហត្ថិវណ្ណំ តថេវស្សំ, បព្ពតំ ជលធិំ តថា;

ចន្ទញ្ច សូរិយំ មេរុំ, សក្កវណ្ណញ្ច ទស្សយុំ.

៤៤១. ‘‘‘យសោធរា មយំ វីរ, បាទេ វន្ទាម ចក្ខុម;

តវ ចិរបភាវេន, និប្ផន្នា នរនាយក.

៤៤២. ‘‘‘ឥទ្ធីសុ ច វសី ហោម, ទិព្ពាយ សោតធាតុយា;

ចេតោបរិយញាណស្ស, វសី ហោម មហាមុនេ.

៤៤៣. ‘‘‘បុព្ពេនិវាសំ ជានាម, ទិព្ពចក្ខុ វិសោធិតំ;

សព្ពាសវបរិក្ខីណា, នត្ថិ ទានិ បុនព្ភវោ.

៤៤៤. ‘‘‘អត្ថធម្មនិរុត្តីសុ, បដិភានេ តថេវ ច;

ញាណំ អម្ហំ មហាវីរ, ឧប្បន្នំ តវ សន្តិកេ.

៤៤៥. ‘‘‘បុព្ពានំ លោកនាថានំ, សង្គមំ នោ និទស្សិតំ;

អធិការា ពហូ អម្ហំ, តុយ្ហត្ថាយ មហាមុនេ.

៤៤៦. ‘‘‘យំ អម្ហំ បូរិតំ កម្មំ, កុសលំ សរសេ មុនេ;

តុយ្ហត្ថាយ មហាវីរ, បុញ្ញានុបចិតានិ នោ.

៤៤៧. ‘‘‘អភព្ពដ្ឋានេ វជ្ជេត្វា, វារយិម្ហ អនាចរំ;

តុយ្ហត្ថាយ មហាវីរ, ចត្តានិ ជីវិតានិ នោ [សញ្ចត្តំ ជីវិតម្បិ នោ (ស្យា.)].

៤៤៨. ‘‘‘នេកកោដិសហស្សានិ, ភរិយត្ថាយទាសិ នោ;

ន តត្ថ វិមនា ហោម, តុយ្ហត្ថាយ មហាមុនេ.

៤៤៩. ‘‘‘នេកកោដិសហស្សានិ, ឧបការាយទាសិ នោ;

ន តត្ថ វិមនា ហោម, តុយ្ហត្ថាយ មហាមុនេ.

៤៥០. ‘‘‘នេកកោដិសហស្សានិ, ភោជនត្ថាយទាសិ នោ;

ន តត្ថ វិមនា ហោម, តុយ្ហត្ថាយ មហាមុនេ.

៤៥១. ‘‘‘នេកកោដិសហស្សានិ, ជីវិតានិ ចជិម្ហសេ [ចជិម្ហ នោ (បី. ក.)];

ភយមោក្ខំ ករិស្សាម, ជីវិតានិ ចជិម្ហសេ.

៤៥២. ‘‘‘អង្គគតេ អលង្ការេ, វត្ថេ នានាវិធេ ពហូ;

ឥត្ថិភណ្ឌេ ន គូហាម, តុយ្ហត្ថាយ មហាមុនេ.

៤៥៣. ‘‘‘ធនធញ្ញបរិច្ចាគំ, គាមានិ និគមានិ ច;

ខេត្តំ បុត្តា ច ធីតា ច, បរិច្ចត្តា មហាមុនេ.

៤៥៤. ‘‘‘ហត្ថី អស្សា គវា ចាបិ, ទាសិយោ បរិចារិកា;

តុយ្ហត្ថាយ មហាវីរ, បរិច្ចត្តំ អសង្ខិយំ.

៤៥៥. ‘‘‘យំ អម្ហេ បដិមន្តេសិ, ទានំ ទស្សាម យាចកេ;

វិមនំ នោ ន បស្សាម, ទទតោ ទានមុត្តមំ.

៤៥៦. ‘‘‘នានាវិធំ ពហុំ ទុក្ខំ, សំសារេ ច ពហុព្ពិធេ;

តុយ្ហត្ថាយ មហាវីរ, អនុភុត្តំ អសង្ខិយំ.

៤៥៧. ‘‘‘សុខប្បត្តានុមោទាម, ន ច ទុក្ខេសុ ទុម្មនា;

សព្ពត្ថ តុលិតា ហោម, តុយ្ហត្ថាយ មហាមុនេ.

៤៥៨. ‘‘‘អនុមគ្គេន សម្ពុទ្ធោ, យំ ធម្មំ អភិនីហរិ;

អនុភោត្វា សុខំ ទុក្ខំ, បត្តោ ពោធិំ មហាមុនេ.

៤៥៩. ‘‘‘ព្រហ្មទេវញ្ច សម្ពុទ្ធំ, គោតមំ លោកនាយកំ;

អញ្ញេសំ លោកនាថានំ, សង្គមំ តេហិ នោ ពហូ.

៤៦០. ‘‘‘អធិការំ ពហុំ អម្ហេ, តុយ្ហត្ថាយ មហាមុនេ;

គវេសតោ ពុទ្ធធម្មេ, មយំ តេ បរិចារិកា.

៤៦១. ‘‘‘កប្បេ ច សតសហស្សេ, ចតុរោ ច អសង្ខិយេ;

ទីបង្ករោ មហាវីរោ, ឧប្បជ្ជិ លោកនាយកោ.

៤៦២. ‘‘‘បច្ចន្តទេសវិសយេ, និមន្តេត្វា តថាគតំ;

តស្ស អាគមនំ មគ្គំ, សោធេន្តិ តុដ្ឋមានសា.

៤៦៣. ‘‘‘តេន កាលេន សោ អាសិ, សុមេធោ នាម ព្រាហ្មណោ;

មគ្គញ្ច បដិយាទេសិ, អាយតោ សព្ពទស្សិនោ.

៤៦៤. ‘‘‘តេន កាលេន អហុម្ហ, សព្ពា ព្រាហ្មណសម្ភវា;

ថលូទជានិ បុប្ផានិ, អាហរិម្ហ សមាគមំ.

៤៦៥. ‘‘‘តស្មិំ សោ សមយេ ពុទ្ធោ, ទីបង្ករោ មហាយសោ;

វិយាកាសិ មហាវីរោ, ឥសិមុគ្គតមានសំ.

៤៦៦. ‘‘‘ចលតី រវតី បុថវី, សង្កម្បតិ សទេវកេ;

តស្ស កម្មំ បកិត្តេន្តេ, ឥសិមុគ្គតមានសំ.

៤៦៧. ‘‘‘ទេវកញ្ញា មនុស្សា ច, មយញ្ចាបិ សទេវកា;

នានាបូជនីយំ ភណ្ឌំ, បូជយិត្វាន បត្ថយុំ.

៤៦៨. ‘‘‘តេសំ ពុទ្ធោ វិយាកាសិ, ជោតិទីប សនាមកោ;

អជ្ជ យេ បត្ថិតា អត្ថិ, តេ ភវិស្សន្តិ សម្មុខា.

៤៦៩. ‘‘‘អបរិមេយ្យេ ឥតោ កប្បេ, យំ នោ ពុទ្ធោ វិយាករិ;

តំ វាចមនុមោទេន្តា, ឯវំការី អហុម្ហ នោ.

៤៧០. ‘‘‘តស្ស កម្មស្ស សុកតស្ស, តស្ស ចិត្តំ បសាទយុំ;

ទេវមានុសិកំ យោនិំ, អនុភោត្វា អសង្ខិយំ.

៤៧១. ‘‘‘សុខទុក្ខេនុភោត្វាន, ទេវេសុ មានុសេសុ ច;

បច្ឆិមេ ភវេ សម្បត្តេ, ជាតាម្ហ សាកិយេ កុលេ.

៤៧២. ‘‘‘រូបវតី ភោគវតី, យសសីលវតី តតោ;

សព្ពង្គសម្បទា ហោម, កុលេសុ អភិសក្កតា.

៤៧៣. ‘‘‘លាភំ សិលោកំ សក្ការំ, លោកធម្មសមាគមំ;

ចិត្តញ្ច ទុក្ខិតំ នត្ថិ, វសាម អកុតោភយា.

៤៧៤. ‘‘‘វុត្តញ្ហេតំ ភគវតា, រញ្ញោ អន្តេបុរេ តទា;

ខត្តិយានំ បុរេ វីរ [តាសំ (ស្យា.)], ឧបការញ្ច និទ្ទិសិ.

៤៧៥. ‘‘‘ឧបការា ច យា នារី, យា ច នារី សុខេ ទុខេ;

អត្ថក្ខាយី ច យា នារី, យា ច នារីនុកម្បិកា.

៤៧៦. ‘‘‘ធម្មំ ចរេ សុចរិតំ, ន នំ ទុច្ចរិតំ ចរេ;

ធម្មចារី សុខំ សេតិ, អស្មិំ លោកេ បរម្ហិ ច.

៤៧៧. ‘‘‘អគារំ វិជហិត្វាន, បព្ពជិម្ហនគារិយំ;

អឌ្ឍមាសេ អសម្បត្តេ, ចតុសច្ចំ ផុសិម្ហ នោ.

៤៧៨. ‘‘‘ចីវរំ បិណ្ឌបាតញ្ច, បច្ចយំ សយនាសនំ;

ឧបនេន្តិ ពហូ អម្ហេ, សាគរស្សេវ ឩមិយោ.

៤៧៩. ‘‘‘កិលេសា ឈាបិតា អម្ហំ [មយ្ហំ (ស្យា.), អម្ហាកំ (ក.)], ភវា សព្ពេ សមូហតា;

នាគីវ ពន្ធនំ ឆេត្វា, វិហរាម អនាសវា.

៤៨០. ‘‘‘ស្វាគតំ វត នោ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៤៨១. ‘‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’.

៤៨២. ‘‘ឯវំ ពហុវិធំ ទុក្ខំ, សម្បត្តី ច ពហុព្ពិធា;

វិសុទ្ធភាវំ សម្បត្តា, លភាម សព្ពសម្បទា.

៤៨៣. ‘‘យា ទទន្តិ សកត្តានំ, បុញ្ញត្ថាយ មហេសិនោ;

សហាយសម្បទា ហោន្តិ, និព្ពានបទមសង្ខតំ.

៤៨៤. ‘‘បរិក្ខីណំ អតីតញ្ច, បច្ចុប្បន្នំ អនាគតំ;

សព្ពកម្មម្បិ នោ ខីណំ, បាទេ វន្ទាម ចក្ខុម.

៤៨៥. ‘‘និព្ពានាយ វទន្តីនំ, កិំ វោ វក្ខាម ឧត្តរិ;

សន្តសង្ខតទោសញ្ហិ, បប្បោថ [សន្តសង្ខតទោសោ យោ, បជ្ជោតំ (ស្យា. បី. ក.)] អមតំ បទំ’’.

ឥត្ថំ សុទំ យសោធរាបមុខានិ អដ្ឋារសភិក្ខុនីសហស្សានិ ភគវតោ សម្មុខា ឥមា គាថាយោ អភាសិត្ថាតិ.

យសោធរាបមុខអដ្ឋារសភិក្ខុនីសហស្សាបទានំ ទសមំ.

កុណ្ឌលកេសីវគ្គោ តតិយោ.