៣. មោទកទាយិកាថេរីអបទានំ

៣០. ‘‘នគរេ ពន្ធុមតិយា, កុម្ភទាសី អហោសហំ;

មម ភាគំ គហេត្វាន, គច្ឆំ ឧទកហារិកា [ឧទកហារិកំ (សី.), ឧទកហារិកេ (ស្យា.)].

៣១. ‘‘បន្ថម្ហិ សមណំ ទិស្វា, សន្តចិត្តំ សមាហតំ;

បសន្នចិត្តា សុមនា, មោទកេ តីណិទាសហំ.

៣២. ‘‘តេន កម្មេន សុកតេន, ចេតនាបណិធីហិ ច;

ឯកនវុតិកប្បានិ [ឯកូនតិំសកប្បានិ (ស្យា.)], វិនិបាតំ នគច្ឆហំ.

៣៣. ‘‘សម្បត្តិ តំ [សម្បត្តិញ្ច (ស្យា.), សម្បត្តិកំ (ក.)] ករិត្វាន, សព្ពំ អនុភវិំ អហំ;

មោទកេ តីណិ ទត្វាន, បត្តាហំ អចលំ បទំ.

៣៤. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៣៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ មោទកទាយិកា ភិក្ខុនី ឥមា គាថាយោ អភាសិត្ថាតិ.

មោទកទាយិកាថេរិយាបទានំ តតិយំ.