៩. បញ្ចទីបិកាថេរីអបទានំ

៩១. ‘‘នគរេ ហំសវតិយា, ចារិកី [ចារិនិំ (ស្យា.)] អាសហំ តទា;

អារាមេន ច អារាមំ, ចរាមិ កុសលត្ថិកា.

៩២. ‘‘កាឡបក្ខម្ហិ ទិវសេ, អទ្ទសំ ពោធិមុត្តមំ;

តត្ថ ចិត្តំ បសាទេត្វា, ពោធិមូលេ និសីទហំ.

៩៣. ‘‘គរុចិត្តំ ឧបដ្ឋេត្វា, សិរេ កត្វាន អញ្ជលិំ;

សោមនស្សំ បវេទេត្វា, ឯវំ ចិន្តេសិ តាវទេ.

៩៤. ‘‘‘យទិ ពុទ្ធោ អមិតគុណោ, អសមប្បដិបុគ្គលោ;

ទស្សេតុ បាដិហីរំ មេ, ពោធិ ឱភាសតុ អយំ’.

៩៥. ‘‘សហ អាវជ្ជិតេ មយ្ហំ, ពោធិ បជ្ជលិ តាវទេ;

សព្ពសោណ្ណមយា អាសិ, ទិសា សព្ពា វិរោចតិ.

៩៦. ‘‘សត្តរត្តិន្ទិវំ [សត្តរត្តិទិវំ (បី. ក.)] តត្ថ, ពោធិមូលេ និសីទហំ;

សត្តមេ ទិវសេ បត្តេ, ទីបបូជំ អកាសហំ.

៩៧. ‘‘អាសនំ បរិវារេត្វា, បញ្ចទីបានិ បជ្ជលុំ;

យាវ ឧទេតិ សូរិយោ, ទីបា មេ បជ្ជលុំ តទា.

៩៨. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៩៩. ‘‘តត្ថ មេ សុកតំ ព្យម្ហំ, បញ្ចទីបាតិ វុច្ចតិ;

សដ្ឋិយោជនមុព្ពេធំ [សតយោជនមុព្ពេធំ (សី. ស្យា. បី.)], តិំសយោជនវិត្ថតំ [សដ្ឋិ… (ស្យា. បី.)].

១០០. ‘‘អសង្ខិយានិ ទីបានិ, បរិវារេ ជលន្តិ មេ;

យាវតា ទេវភវនំ, ទីបាលោកេន ជោតតិ.

១០១. ‘‘បរម្មុខា និសីទិត្វា [បុរត្ថាភិមុខា សន្តិ (ស្យា.), បុរត្ថាភិមុខា ថិតា (បី.)], យទិ ឥច្ឆាមិ បស្សិតុំ;

ឧទ្ធំ អធោ ច តិរិយំ, សព្ពំ បស្សាមិ ចក្ខុនា.

១០២. ‘‘យាវតា អភិកង្ខាមិ, ទដ្ឋុំ សុគតទុគ្គតេ [សុកតទុក្កតេ (បី.];

តត្ថ អាវរណំ នត្ថិ, រុក្ខេសុ បព្ពតេសុ វា.

១០៣. ‘‘អសីតិ ទេវរាជូនំ, មហេសិត្តមការយិំ;

សតានំ ចក្កវត្តីនំ, មហេសិត្តមការយិំ.

១០៤. ‘‘យំ យំ យោនុបបជ្ជាមិ, ទេវត្តំ អថ មានុសំ;

ទីបសតសហស្សានិ, បរិវារេ ជលន្តិ មេ.

១០៥. ‘‘ទេវលោកា ចវិត្វាន, ឧប្បជ្ជិំ មាតុកុច្ឆិយំ;

មាតុកុច្ឆិគតា សន្តី [មាតុកុច្ឆិគតំ សន្តិំ (សី.)], អក្ខិ មេ ន និមីលតិ.

១០៦. ‘‘ទីបសតសហស្សានិ, បុញ្ញកម្មសមង្គិតា;

ជលន្តិ សូតិកាគេហេ [សូតិឃរេ បជ្ជលន្តិ (សព្ពត្ថ)], បញ្ចទីបានិទំ ផលំ.

១០៧. ‘‘បច្ឆិមេ ភវេ សម្បត្តេ, មានសំ វិនិវត្តយិំ;

អជរាមតំ សីតិភាវំ, និព្ពានំ ផស្សយិំ អហំ.

១០៨. ‘‘ជាតិយា សត្តវស្សាហំ, អរហត្តមបាបុណិំ;

ឧបសម្បាទយី ពុទ្ធោ, គុណមញ្ញាយ គោតមោ.

១០៩. ‘‘មណ្ឌបេ រុក្ខមូលេ វា, បាសាទេសុ គុហាសុ វា;

សុញ្ញាគារេ វសន្តិយា [ច ឈាយន្តេ (សី.), ច ឈាយន្តា (បី.), បជ្ឈាយន្តា (ស្យា.)], បញ្ចទីបា ជលន្តិ មេ.

១១០. ‘‘ទិព្ពចក្ខុ វិសុទ្ធំ មេ, សមាធិកុសលា អហំ;

អភិញ្ញាបារមិប្បត្តា, បញ្ចទីបានិទំ ផលំ.

១១១. ‘‘សព្ពវោសិតវោសានា, កតកិច្ចា អនាសវា;

បញ្ចទីបា មហាវីរ, បាទេ វន្ទាមិ [វន្ទតិ (សី. ក.)] ចក្ខុម.

១១២. ‘‘សតសហស្សិតោ កប្បេ, យំ ទីបមទទិំ តទា;

ទុគ្គតិំ នាភិជានាមិ, បញ្ចទីបានិទំ ផលំ.

១១៣. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១១៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ បញ្ចទីបិកា ភិក្ខុនី ឥមា គាថាយោ អភាសិត្ថាតិ.

បញ្ចទីបិកាថេរិយាបទានំ នវមំ.