១០. ឧទកទាយិកាថេរីអបទានំ

១១៦. ‘‘នគរេ ពន្ធុមតិយា, អហោសិំ ឧទហារិកា;

ឧទហារេន ជីវាមិ, តេន បោសេមិ ទារកេ.

១១៧. ‘‘ទេយ្យធម្មោ ច មេ នត្ថិ, បុញ្ញក្ខេត្តេ អនុត្តរេ;

កោដ្ឋកំ ឧបសង្កម្ម, ឧទកំ បដ្ឋបេសហំ.

១១៨. ‘‘តេន កម្មេន សុកតេន, តាវតិំសមគច្ឆហំ;

តត្ថ មេ សុកតំ ព្យម្ហំ, ឧទហារេន និម្មិតំ.

១១៩. ‘‘អច្ឆរានំ សហស្សស្ស, អហញ្ហិ បវរា តទា;

ទសដ្ឋានេហិ តា សព្ពា, អភិភោមិ សទា អហំ.

១២០. ‘‘បញ្ញាសំ ទេវរាជូនំ, មហេសិត្តមការយិំ;

វីសតិចក្កវត្តីនំ, មហេសិត្តមការយិំ.

១២១. ‘‘ទុវេ ភវេ សំសរាមិ, ទេវត្តេ អថ មានុសេ;

ទុគ្គតិំ នាភិជានាមិ, ទកទានស្សិទំ ផលំ.

១២២. ‘‘បព្ពតគ្គេ ទុមគ្គេ វា, អន្តលិក្ខេ ច ភូមិយំ;

យទា ឧទកមិច្ឆាមិ, ខិប្បំ បដិលភាមហំ.

១២៣. ‘‘អវុដ្ឋិកា ទិសា នត្ថិ, សន្តត្តា កុថិតាបិ [សន្តត្តា កុថិតា ន ច (សី. បី.), សន្តត្តា ខុប្បិតា ហិ មេ (ស្យា.)] ច;

មម សង្កប្បមញ្ញាយ, មហាមេឃោ បវស្សតិ.

១២៤. ‘‘កទាចិ នីយមានាយ, ញាតិសង្ឃេន មេ តទា;

យទា ឥច្ឆាមហំ វស្សំ, មហាមេឃោ អជាយថ.

១២៥. ‘‘ឧណ្ហំ វា បរិឡាហោ វា, សរីរេ មេ ន វិជ្ជតិ;

កាយេ ច មេ រជោ នត្ថិ, ទកទានស្សិទំ ផលំ.

១២៦. ‘‘វិសុទ្ធមនសា អជ្ជ, អបេតមនបាបិកា;

សព្ពាសវបរិក្ខីណា, នត្ថិ ទានិ បុនព្ភវោ.

១២៧. ‘‘ឯកនវុតិតោ កប្បេ, យំ ទកំ អទទិំ តទា;

ទុគ្គតិំ នាភិជានាមិ, ទកទានស្សិទំ ផលំ.

១២៨. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១២៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ឧទកទាយិកា ភិក្ខុនី ឥមា គាថាយោ អភាសិត្ថាតិ.

ឧទកទាយិកាថេរិយាបទានំ ទសមំ.

សុមេធាវគ្គោ បឋមោ.