១. សោណកោឡិវិសត្ថេរគាថា

៦៣២. ‘‘យាហុ រដ្ឋេ សមុក្កដ្ឋោ, រញ្ញោ អង្គស្ស បទ្ធគូ [បត្ថគូ (ស្យា.), បដ្ឋគូ (ក.)];

ស្វាជ្ជ ធម្មេសុ ឧក្កដ្ឋោ, សោណោ ទុក្ខស្ស បារគូ.

៦៣៣. ‘‘បញ្ច ឆិន្ទេ បញ្ច ជហេ, បញ្ច ចុត្តរិ ភាវយេ;

បញ្ចសង្គាតិគោ ភិក្ខុ, ឱឃតិណ្ណោតិ វុច្ចតិ.

៦៣៤. ‘‘ឧន្នឡស្ស បមត្តស្ស, ពាហិរាសស្ស [ពាហិរាសយស្ស (ក.)] ភិក្ខុនោ;

សីលំ សមាធិ បញ្ញា ច, បារិបូរិំ ន គច្ឆតិ.

៦៣៥. ‘‘យញ្ហិ កិច្ចំ អបវិទ្ធំ [តទបវិទ្ធំ (សី. ស្យា.)], អកិច្ចំ បន ករីយតិ;

ឧន្នឡានំ បមត្តានំ, តេសំ វឌ្ឍន្តិ អាសវា.

៦៣៦. ‘‘យេសញ្ច សុសមារទ្ធា, និច្ចំ កាយគតា សតិ;

អកិច្ចំ តេ ន សេវន្តិ, កិច្ចេ សាតច្ចការិនោ;

សតានំ សម្បជានានំ, អត្ថំ គច្ឆន្តិ អាសវា.

៦៣៧. ‘‘ឧជុមគ្គម្ហិ អក្ខាតេ, គច្ឆថ មា និវត្តថ;

អត្តនា ចោទយត្តានំ, និព្ពានមភិហារយេ.

៦៣៨. ‘‘អច្ចារទ្ធម្ហិ វីរិយម្ហិ, សត្ថា លោកេ អនុត្តរោ;

វីណោបមំ ករិត្វា មេ, ធម្មំ ទេសេសិ ចក្ខុមា;

តស្សាហំ វចនំ សុត្វា, វិហាសិំ សាសនេ រតោ.

៦៣៩. ‘‘សមថំ បដិបាទេសិំ, ឧត្តមត្ថស្ស បត្តិយា;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៦៤០. ‘‘នេក្ខម្មេ [និក្ខមេ (ក.), នេក្ខម្មំ (មហាវ. ២៤៤; អ. និ. ៦.៥៥)] អធិមុត្តស្ស, បវិវេកញ្ច ចេតសោ;

អព្យាបជ្ឈាធិមុត្តស្ស [អព្យាបជ្ឈាធិម្ហត្តស្ស (ក.)], ឧបាទានក្ខយស្ស ច.

៦៤១. ‘‘តណ្ហក្ខយាធិមុត្តស្ស, អសម្មោហញ្ច ចេតសោ;

ទិស្វា អាយតនុប្បាទំ, សម្មា ចិត្តំ វិមុច្ចតិ.

៦៤២. ‘‘តស្ស សម្មា វិមុត្តស្ស, សន្តចិត្តស្ស ភិក្ខុនោ;

កតស្ស បដិចយោ នត្ថិ, ករណីយំ ន វិជ្ជតិ.

៦៤៣. ‘‘សេលោ យថា ឯកឃនោ [ឯកឃនោ (ក.)], វាតេន ន សមីរតិ;

ឯវំ រូបា រសា សទ្ទា, គន្ធា ផស្សា ច កេវលា.

៦៤៤. ‘‘ឥដ្ឋា ធម្មា អនិដ្ឋា ច, នប្បវេធេន្តិ តាទិនោ;

ឋិតំ ចិត្តំ វិសញ្ញុត្តំ, វយញ្ចស្សានុបស្សតី’’តិ.

… សោណោ កោឡិវិសោ ថេរោ….

តេរសនិបាតោ និដ្ឋិតោ.