៩. គូថខាទកបេតិវត្ថុ

៧៧៤. ‘‘គូថកូបតោ ឧគ្គន្ត្វា, កា នុ ទីនា បតិដ្ឋសិ;

និស្សំសយំ បាបកម្មន្តា, កិំ នុ សទ្ទហសេ តុវ’’ន្តិ.

៧៧៥. ‘‘អហំ ភទន្តេ បេតីម្ហិ, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’’តិ.

៧៧៦. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, ឥទំ ទុក្ខំ និគច្ឆសី’’តិ.

៧៧៧. ‘‘អហុ អាវាសិកោ មយ្ហំ, ឥស្សុកី កុលមច្ឆរី;

អជ្ឈោសិតោ មយ្ហំ ឃរេ, កទរិយោ បរិភាសកោ.

៧៧៨. ‘‘តស្សាហំ វចនំ សុត្វា, ភិក្ខវោ បរិភាសិសំ;

តស្ស កម្មវិបាកេន, បេតលោកំ ឥតោ គតា’’តិ.

៧៧៩. ‘‘អមិត្តោ មិត្តវណ្ណេន, យោ តេ អាសិ កុលូបកោ;

កាយស្ស ភេទា ទុប្បញ្ញោ, កិំ នុ បេច្ច គតិំ គតោ’’តិ.

៧៨០. ‘‘តស្សេវាហំ បាបកម្មស្ស, សីសេ តិដ្ឋាមិ មត្ថកេ;

សោ ច បរវិសយំ បត្តោ, មមេវ បរិចារកោ.

៧៨១. ‘‘យំ ភទន្តេ ហទន្តញ្ញេ, ឯតំ មេ ហោតិ ភោជនំ;

អហញ្ច ខោ យំ ហទាមិ, ឯតំ សោ ឧបជីវតី’’តិ.

គូថខាទកបេតិវត្ថុ នវមំ.