១០. គណបេតវត្ថុ

៧៨២. ‘‘នគ្គា ទុព្ពណ្ណរូបាត្ថ, កិសា ធមនិសន្ថតា;

ឧប្ផាសុលិកា [ឧប្បាសុឡិកា (ក.)] កិសិកា, កេ នុ តុម្ហេត្ថ មារិសា’’តិ.

៧៨៣. ‘‘មយំ ភទន្តេ បេតាម្ហា, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’’តិ.

៧៨៤. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, បេតលោកំ ឥតោ គតា’’តិ.

៧៨៥. ‘‘អនាវដេសុ តិត្ថេសុ, វិចិនិម្ហទ្ធមាសកំ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៧៨៦. ‘‘នទិំ ឧបេម តសិតា, រិត្តកា បរិវត្តតិ;

ឆាយំ ឧបេម ឧណ្ហេសុ, អាតបោ បរិវត្តតិ.

៧៨៧. ‘‘អគ្គិវណ្ណោ ច នោ វាតោ, ឌហន្តោ ឧបវាយតិ;

ឯតញ្ច ភន្តេ អរហាម, អញ្ញញ្ច បាបកំ តតោ.

៧៨៨. ‘‘អបិ យោជនានិ [អធិយោជនានិ (សី. ក.)] គច្ឆាម, ឆាតា អាហារគេធិនោ;

អលទ្ធាវ និវត្តាម, អហោ នោ អប្បបុញ្ញតា.

៧៨៩. ‘‘ឆាតា បមុច្ឆិតា ភន្តា, ភូមិយំ បដិសុម្ភិតា;

ឧត្តានា បដិកិរាម, អវកុជ្ជា បតាមសេ.

៧៩០. ‘‘តេ ច តត្ថេវ បតិតា [តត្ថ បបហិតា (ក.)], ភូមិយំ បដិសុម្ភិតា;

ឧរំ សីសញ្ច ឃដ្ដេម, អហោ នោ អប្បបុញ្ញតា.

៧៩១. ‘‘ឯតញ្ច ភន្តេ អរហាម, អញ្ញញ្ច បាបកំ តតោ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៧៩២. ‘‘តេ ហិ នូន ឥតោ គន្ត្វា, យោនិំ លទ្ធាន មានុសិំ;

វទញ្ញូ សីលសម្បន្នា, កាហាម កុសលំ ពហុ’’ន្តិ.

គណបេតវត្ថុ ទសមំ.