៨. គូថខាទកបេតវត្ថុ

៧៦៦. ‘‘គូថកូបតោ ឧគ្គន្ត្វា, កោ នុ ទីនោ បតិដ្ឋសិ [ទីនោ ហិ តិដ្ឋសិ (សី.)];

និស្សំសយំ បាបកម្មន្តោ, កិំ នុ សទ្ទហសេ តុវ’’ន្តិ.

៧៦៧. ‘‘អហំ ភទន្តេ បេតោម្ហិ, ទុគ្គតោ យមលោកិកោ;

បាបកម្មំ ករិត្វាន, បេតលោកំ ឥតោ គតោ’’.

៧៦៨. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, ឥទំ ទុក្ខំ និគច្ឆសី’’តិ.

៧៦៩. ‘‘អហុ អាវាសិកោ មយ្ហំ, ឥស្សុកី កុលមច្ឆរី;

អជ្ឈោសិតោ មយ្ហំ ឃរេ, កទរិយោ បរិភាសកោ.

៧៧០. ‘‘តស្សាហំ វចនំ សុត្វា, ភិក្ខវោ បរិភាសិសំ;

តស្ស កម្មវិបាកេន, បេតលោកំ ឥតោ គតោ’’តិ.

៧៧១. ‘‘អមិត្តោ មិត្តវណ្ណេន, យោ តេ អាសិ កុលូបកោ;

កាយស្ស ភេទា ទុប្បញ្ញោ, កិំ នុ បេច្ច គតិំ គតោ’’តិ.

៧៧២. ‘‘តស្សេវាហំ បាបកម្មស្ស, សីសេ តិដ្ឋាមិ មត្ថកេ;

សោ ច បរវិសយំ បត្តោ, មមេវ បរិចារកោ.

៧៧៣. ‘‘យំ ភទន្តេ ហទន្តញ្ញេ, ឯតំ មេ ហោតិ ភោជនំ;

អហញ្ច ខោ យំ ហទាមិ, ឯតំ សោ ឧបជីវតី’’តិ.

គូថខាទកបេតវត្ថុ អដ្ឋមំ.