៥. ឧច្ឆុបេតវត្ថុ

៧៣៧. ‘‘ឥទំ មម ឧច្ឆុវនំ មហន្តំ, និព្ពត្តតិ បុញ្ញផលំ អនប្បកំ;

តំ ទានិ មេ ន [ន ទានិ មេ តំ (សី. ក.)] បរិភោគមេតិ, អាចិក្ខ ភន្តេ កិស្ស អយំ វិបាកោ.

៧៣៨. ‘‘ហញ្ញាមិ [វិហញ្ញាមិ (ក.)] ខជ្ជាមិ ច វាយមាមិ, បរិសក្កាមិ បរិភុញ្ជិតុំ កិញ្ចិ;

ស្វាហំ ឆិន្នថាមោ កបណោ លាលបាមិ, កិស្ស [កិស្សស្ស (សី.), កិស្សស្សុ (?)] កម្មស្ស អយំ វិបាកោ.

៧៣៩. ‘‘វិឃាតោ ចាហំ បរិបតាមិ ឆមាយំ, បរិវត្តាមិ វារិចរោវ ឃម្មេ;

រុទតោ ច មេ [ទូរតោ ច មេ (ស្យា. ក.)] អស្សុកា និគ្គលន្តិ, អាចិក្ខ ភន្តេ កិស្ស អយំ វិបាកោ.

៧៤០. ‘‘ឆាតោ កិលន្តោ ច បិបាសិតោ ច, សន្តស្សិតោ សាតសុខំ ន វិន្ទេ;

បុច្ឆាមិ តំ ឯតមត្ថំ ភទន្តេ, កថំ នុ ឧច្ឆុបរិភោគំ លភេយ្យ’’ន្តិ.

៧៤១. ‘‘បុរេ តុវំ កម្មមកាសិ អត្តនា, មនុស្សភូតោ បុរិមាយ ជាតិយា;

អហញ្ច តំ ឯតមត្ថំ វទាមិ, សុត្វាន ត្វំ ឯតមត្ថំ វិជាន.

៧៤២. ‘‘ឧច្ឆុំ តុវំ ខាទមានោ បយាតោ, បុរិសោ ច តេ បិដ្ឋិតោ អន្វគច្ឆិ;

សោ ច តំ បច្ចាសន្តោ កថេសិ, តស្ស តុវំ ន កិញ្ចិ អាលបិត្ថ.

៧៤៣. ‘‘សោ ច តំ អភណន្តំ អយាចិ, ‘ទេហយ្យ ឧច្ឆុ’ន្តិ ច តំ អវោច;

តស្ស តុវំ បិដ្ឋិតោ ឧច្ឆុំ អទាសិ, តស្សេតំ កម្មស្ស អយំ វិបាកោ.

៧៤៤. ‘‘ឥង្ឃ ត្វំ គន្ត្វាន បិដ្ឋិតោ គណ្ហេយ្យាសិ [ឥង្ឃ ត្វំ បិដ្ឋិតោ គណ្ហ ឧច្ឆុំ (សី.)], គហេត្វាន តំ ខាទស្សុ យាវទត្ថំ;

តេនេវ ត្វំ អត្តមនោ ភវិស្សសិ, ហដ្ឋោ ចុទគ្គោ ច បមោទិតោ ចា’’តិ.

៧៤៥. គន្ត្វាន សោ បិដ្ឋិតោ អគ្គហេសិ, គហេត្វាន តំ ខាទិ យាវទត្ថំ;

តេនេវ សោ អត្តមនោ អហោសិ, ហដ្ឋោ ចុទគ្គោ ច បមោទិតោ ចាតិ.

ឧច្ឆុបេតវត្ថុ បញ្ចមំ.