៦. កុមារបេតវត្ថុ

៧៤៦. ‘‘សាវត្ថិ នាម នគរំ, ហិមវន្តស្ស បស្សតោ;

តត្ថ អាសុំ ទ្វេ កុមារា, រាជបុត្តាតិ មេ សុតំ.

៧៤៧. ‘‘សម្មត្តា [បមត្តា (ក.)] រជនីយេសុ, កាមស្សាទាភិនន្ទិនោ;

បច្ចុប្បន្នសុខេ គិទ្ធា, ន តេ បស្សិំសុនាគតំ.

៧៤៨. ‘‘តេ ចុតា ច មនុស្សត្តា, បរលោកំ ឥតោ គតា;

តេធ ឃោសេន្ត្យទិស្សន្តា, បុព្ពេ ទុក្កដមត្តនោ.

៧៤៩. ‘‘‘ពហូសុ វត [ពហុស្សុតេសុ (សី. ក.)] សន្តេសុ, ទេយ្យធម្មេ ឧបដ្ឋិតេ;

នាសក្ខិម្ហា ច អត្តានំ, បរិត្តំ កាតុំ សុខាវហំ.

៧៥០. ‘‘‘កិំ តតោ បាបកំ អស្ស, យំ នោ រាជកុលា ចុតា;

ឧបបន្នា បេត្តិវិសយំ, ខុប្បិបាសសមប្បិតា [ខុប្បិបាសាសមប្បិតា (សី. បី.)].

៧៥១. ‘‘សាមិនោ ឥធ ហុត្វាន, ហោន្តិ អសាមិនោ តហិំ;

ភមន្តិ [ចរន្តិ (សី. បី.), មរន្តិ (ស្យា.)] ខុប្បិបាសាយ, មនុស្សា ឧន្នតោនតា.

៧៥២. ‘‘ឯតមាទីនវំ ញត្វា, ឥស្សរមទសម្ភវំ;

បហាយ ឥស្សរមទំ, ភវេ សគ្គគតោ នរោ;

កាយស្ស ភេទា សប្បញ្ញោ, សគ្គំ សោ ឧបបជ្ជតី’’តិ.

កុមារបេតវត្ថុ ឆដ្ឋំ.