១. អម្ពសក្ករបេតវត្ថុ

៥១៧. វេសាលី នាម នគរត្ថិ វជ្ជីនំ, តត្ថ អហុ លិច្ឆវិ អម្ពសក្ករោ [អម្ពសក្ខរោ (សី. ស្យា.), អប្បសក្ករោ (ក.)];

ទិស្វាន បេតំ នគរស្ស ពាហិរំ, តត្ថេវ បុច្ឆិត្ថ តំ ការណត្ថិកោ.

៥១៨. ‘‘សេយ្យា និសជ្ជា នយិមស្ស អត្ថិ, អភិក្កមោ នត្ថិ បដិក្កមោ ច;

អសិតបីតខាយិតវត្ថភោគា, បរិចារិកា [បរិចារណា (សី. បី.)] សាបិ ឥមស្ស នត្ថិ.

៥១៩. ‘‘យេ ញាតកា ទិដ្ឋសុតា សុហជ្ជា, អនុកម្បកា យស្ស អហេសុំ បុព្ពេ;

ទដ្ឋុម្បិ តេ ទានិ ន តំ លភន្តិ, វិរាជិតត្តោ [វិរាធិតត្តោ (សី. បី.)] ហិ ជនេន តេន.

៥២០. ‘‘ន ឱគ្គតត្តស្ស ភវន្តិ មិត្តា, ជហន្តិ មិត្តា វិកលំ វិទិត្វា;

អត្ថញ្ច ទិស្វា បរិវារយន្តិ, ពហូ មិត្តា ឧគ្គតត្តស្ស ហោន្តិ.

៥២១. ‘‘និហីនត្តោ សព្ពភោគេហិ កិច្ឆោ, សម្មក្ខិតោ សម្បរិភិន្នគត្តោ;

ឧស្សាវពិន្ទូវ បលិម្បមានោ, អជ្ជ សុវេ ជីវិតស្សូបរោធោ.

៥២២. ‘‘ឯតាទិសំ ឧត្តមកិច្ឆប្បត្តំ, ឧត្តាសិតំ បុចិមន្ទស្ស សូលេ;

‘អថ ត្វំ កេន វណ្ណេន វទេសិ យក្ខ, ជីវ ភោ ជីវិតមេវ សេយ្យោ’’’តិ.

៥២៣. ‘‘សាលោហិតោ ឯស អហោសិ មយ្ហំ, អហំ សរាមិ បុរិមាយ ជាតិយា;

ទិស្វា ច មេ ការុញ្ញមហោសិ រាជ, មា បាបធម្មោ និរយំ បតាយំ [បតិ + អយំ = បតាយំ].

៥២៤. ‘‘ឥតោ ចុតោ លិច្ឆវិ ឯស បោសោ, សត្តុស្សទំ និរយំ ឃោររូបំ;

ឧបបជ្ជតិ ទុក្កដកម្មការី, មហាភិតាបំ កដុកំ ភយានកំ.

៥២៥. ‘‘អនេកភាគេន គុណេន សេយ្យោ, អយមេវ សូលោ និរយេន តេន;

ឯកន្តទុក្ខំ កដុកំ ភយានកំ, ឯកន្តតិព្ពំ និរយំ បតាយំ [បតេ + អយំ = បតាយំ].

៥២៦. ‘‘ឥទញ្ច សុត្វា វចនំ មមេសោ, ទុក្ខូបនីតោ វិជហេយ្យ បាណំ;

តស្មា អហំ សន្តិកេ ន ភណាមិ, មា មេ កតោ ជីវិតស្សូបរោធោ’’.

៥២៧. ‘‘អញ្ញាតោ ឯសោ [អជ្ឈិតោ ឯស (ក.)] បុរិសស្ស អត្ថោ, អញ្ញម្បិ ឥច្ឆាមសេ បុច្ឆិតុំ តុវំ;

ឱកាសកម្មំ សចេ នោ ករោសិ, បុច្ឆាម តំ នោ ន ច កុជ្ឈិតព្ព’’ន្តិ.

៥២៨. ‘‘អទ្ធា បដិញ្ញា មេ តទា អហុ [បដិញ្ញាតមេតំ តទាហុ (ក.), បដិញ្ញា ន មេតេ តទា អហុ (?)], នាចិក្ខនា អប្បសន្នស្ស ហោតិ;

អកាមា សទ្ធេយ្យវចោតិ កត្វា, បុច្ឆស្សុ មំ កាមំ យថា វិសយ្ហ’’ន្តិ [វិសយំ (ក.)].

៥២៩. ‘‘យំ កិញ្ចហំ ចក្ខុនា បស្សិស្សាមិ [បស្សាមិ (ក.)], សព្ពម្បិ តាហំ អភិសទ្ទហេយ្យំ;

ទិស្វាវ តំ នោបិ ចេ សទ្ទហេយ្យំ, ករេយ្យាសិ [ករោហិ (កត្ថចិ)] មេ យក្ខ និយស្សកម្ម’’ន្តិ.

៥៣០. ‘‘សច្ចប្បដិញ្ញា តវ មេសា ហោតុ, សុត្វាន ធម្មំ លភ សុប្បសាទំ;

អញ្ញត្ថិកោ នោ ច បទុដ្ឋចិត្តោ, យំ តេ សុតំ អសុតញ្ចាបិ ធម្មំ;

សព្ពម្បិ អក្ខិស្សំ [សព្ពំ អាចិក្ខិស្សំ (សី.)] យថា បជានន្តិ.

៥៣១. ‘‘សេតេន អស្សេន អលង្កតេន, ឧបយាសិ សូលាវុតកស្ស សន្តិកេ;

យានំ ឥទំ អព្ភុតំ ទស្សនេយ្យំ, កិស្សេតំ កម្មស្ស អយំ វិបាកោ’’តិ.

៥៣២. ‘‘វេសាលិយា នគរស្ស [តស្ស នគរស្ស (សី. ស្យា. បី.)] មជ្ឈេ, ចិក្ខល្លមគ្គេ នរកំ អហោសិ;

គោសីសមេកាហំ បសន្នចិត្តោ, សេតំ [សេតុំ (ស្យា. ក.)] គហេត្វា នរកស្មិំ និក្ខិបិំ.

៥៣៣. ‘‘ឯតស្មិំ បាទានិ បតិដ្ឋបេត្វា, មយញ្ច អញ្ញេ ច អតិក្កមិម្ហា;

យានំ ឥទំ អព្ភុតំ ទស្សនេយ្យំ, តស្សេវ កម្មស្ស អយំ វិបាកោ’’តិ.

៥៣៤. ‘‘វណ្ណោ ច តេ សព្ពទិសា បភាសតិ, គន្ធោ ច តេ សព្ពទិសា បវាយតិ;

យក្ខិទ្ធិបត្តោសិ មហានុភាវោ, នគ្គោ ចាសិ កិស្ស អយំ វិបាកោ’’តិ.

៥៣៥. ‘‘អក្កោធនោ និច្ចបសន្នចិត្តោ, សណ្ហាហិ វាចាហិ ជនំ ឧបេមិ;

តស្សេវ កម្មស្ស អយំ វិបាកោ, ទិព្ពោ មេ វណ្ណោ សតតំ បភាសតិ.

៥៣៦. ‘‘យសញ្ច កិត្តិញ្ច ធម្មេ ឋិតានំ, ទិស្វាន មន្តេមិ [ទិស្វា សមន្តេមិ (ក.)] បសន្នចិត្តោ;

តស្សេវ កម្មស្ស អយំ វិបាកោ, ទិព្ពោ មេ គន្ធោ សតតំ បវាយតិ.

៥៣៧. ‘‘សហាយានំ តិត្ថស្មិំ ន្ហាយន្តានំ, ថលេ គហេត្វា និទហិស្ស ទុស្សំ;

ខិឌ្ឌត្ថិកោ នោ ច បទុដ្ឋចិត្តោ, តេនម្ហិ នគ្គោ កសិរា ច វុត្តី’’តិ.

៥៣៨. ‘‘យោ កីឡមានោ បករោតិ បាបំ, តស្សេទិសំ កម្មវិបាកមាហុ;

អកីឡមានោ បន យោ ករោតិ, កិំ តស្ស កម្មស្ស វិបាកមាហូ’’តិ.

៥៣៩. ‘‘យេ ទុដ្ឋសង្កប្បមនា មនុស្សា, កាយេន វាចាយ ច សង្កិលិដ្ឋា;

កាយស្ស ភេទា អភិសម្បរាយំ, អសំសយំ តេ និរយំ ឧបេន្តិ.

៥៤០. ‘‘អបរេ បន សុគតិមាសមានា, ទានេ រតា សង្គហិតត្តភាវា;

កាយស្ស ភេទា អភិសម្បរាយំ, អសំសយំ តេ សុគតិំ ឧបេន្តី’’តិ.

៥៤១. ‘‘តំ កិន្តិ ជានេយ្យមហំ អវេច្ច, កល្យាណបាបស្ស អយំ វិបាកោ;

កិំ វាហំ ទិស្វា អភិសទ្ទហេយ្យំ, កោ វាបិ មំ សទ្ទហាបេយ្យ ឯត’’ន្តិ.

៥៤២. ‘‘ទិស្វា ច សុត្វា អភិសទ្ទហស្សុ, កល្យាណបាបស្ស អយំ វិបាកោ;

កល្យាណបាបេ ឧភយេ អសន្តេ, សិយា នុ សត្តា សុគតា ទុគ្គតា វា.

៥៤៣. ‘‘នោ ចេត្ថ កម្មានិ ករេយ្យុំ មច្ចា, កល្យាណបាបានិ មនុស្សលោកេ;

នាហេសុំ សត្តា សុគតា ទុគ្គតា វា, ហីនា បណីតា ច មនុស្សលោកេ.

៥៤៤. ‘‘យស្មា ច កម្មានិ ករោន្តិ មច្ចា, កល្យាណបាបានិ មនុស្សលោកេ;

តស្មា ហិ សត្តា សុគតា ទុគ្គតា វា, ហីនា បណីតា ច មនុស្សលោកេ.

៥៤៥. ‘‘ទ្វយជ្ជ កម្មានំ វិបាកមាហុ, សុខស្ស ទុក្ខស្ស ច វេទនីយំ;

តា ទេវតាយោ បរិចារយន្តិ, បច្ចន្តិ ពាលា ទ្វយតំ អបស្សិនោ.

៥៤៦. ‘‘ន មត្ថិ កម្មានិ សយំកតានិ, ទត្វាបិ មេ នត្ថិ យោ [សោ (សព្ពត្ថ)] អាទិសេយ្យ;

អច្ឆាទនំ សយនមថន្នបានំ, តេនម្ហិ នគ្គោ កសិរា ច វុត្តី’’តិ.

៥៤៧. ‘‘សិយា នុ ខោ ការណំ កិញ្ចិ យក្ខ, អច្ឆាទនំ យេន តុវំ លភេថ;

អាចិក្ខ មេ ត្វំ យទត្ថិ ហេតុ, សទ្ធាយិកំ [សទ្ធាយិតំ (សី. បី.)] ហេតុវចោ សុណោមា’’តិ.

៥៤៨. ‘‘កប្បិតកោ [កប្បិនកោ (សី.)] នាម ឥធត្ថិ ភិក្ខុ, ឈាយី សុសីលោ អរហា វិមុត្តោ;

គុត្តិន្ទ្រិយោ សំវុតបាតិមោក្ខោ, សីតិភូតោ ឧត្តមទិដ្ឋិបត្តោ.

៥៤៩. ‘‘សខិលោ វទញ្ញូ សុវចោ សុមុខោ, ស្វាគមោ សុប្បដិមុត្តកោ ច;

បុញ្ញស្ស ខេត្តំ អរណវិហារី, ទេវមនុស្សានញ្ច ទក្ខិណេយ្យោ.

៥៥០. ‘‘សន្តោ វិធូមោ អនីឃោ និរាសោ, មុត្តោ វិសល្លោ អមមោ អវង្កោ;

និរូបធី សព្ពបបញ្ចខីណោ, តិស្សោ វិជ្ជា អនុប្បត្តោ ជុតិមា.

៥៥១. ‘‘អប្បញ្ញាតោ ទិស្វាបិ ន ច សុជានោ, មុនីតិ នំ វជ្ជិសុ វោហរន្តិ;

ជានន្តិ តំ យក្ខភូតា អនេជំ, កល្យាណធម្មំ វិចរន្តំ លោកេ.

៥៥២. ‘‘តស្ស តុវំ ឯកយុគំ ទុវេ វា, មមុទ្ទិសិត្វាន សចេ ទទេថ;

បដិគ្គហីតានិ ច តានិ អស្សុ, មមញ្ច បស្សេថ សន្នទ្ធទុស្ស’’ន្តិ.

៥៥៣. ‘‘កស្មិំ បទេសេ សមណំ វសន្តំ, គន្ត្វាន បស្សេមុ មយំ ឥទានិ;

យោ មជ្ជ [ស មជ្ជ (សី.)] កង្ខំ វិចិកិច្ឆិតញ្ច, ទិដ្ឋីវិសូកានិ វិនោទយេយ្យា’’តិ.

៥៥៤. ‘‘ឯសោ និសិន្នោ កបិនច្ចនាយំ, បរិវារិតោ ទេវតាហិ ពហូហិ;

ធម្មិំ កថំ ភាសតិ សច្ចនាមោ, សកស្មិមាចេរកេ អប្បមត្តោ’’តិ.

៥៥៥. ‘‘តថាហំ [យថាហំ (ក.)] កស្សាមិ គន្ត្វា ឥទានិ, អច្ឆាទយិស្សំ សមណំ យុគេន;

បដិគ្គហិតានិ ច តានិ អស្សុ, តុវញ្ច បស្សេមុ សន្នទ្ធទុស្ស’’ន្តិ.

៥៥៦. ‘‘មា អក្ខណេ បព្ពជិតំ ឧបាគមិ, សាធុ វោ លិច្ឆវិ នេស ធម្មោ;

តតោ ច កាលេ ឧបសង្កមិត្វា, តត្ថេវ បស្សាហិ រហោ និសិន្ន’’ន្តិ.

៥៥៧. តថាតិ វត្វា អគមាសិ តត្ថ, បរិវារិតោ ទាសគណេន លិច្ឆវិ;

សោ តំ នគរំ ឧបសង្កមិត្វា, វាសូបគច្ឆិត្ថ សកេ និវេសនេ.

៥៥៨. តតោ ច កាលេ គិហិកិច្ចានិ កត្វា, ន្ហត្វា បិវិត្វា ច ខណំ លភិត្វា;

វិចេយ្យ បេឡាតោ ច យុគានិ អដ្ឋ, គាហាបយី ទាសគណេន លិច្ឆវិ.

៥៥៩. សោ តំ បទេសំ ឧបសង្កមិត្វា, តំ អទ្ទស សមណំ សន្តចិត្តំ;

បដិក្កន្តំ គោចរតោ និវត្តំ, សីតិភូតំ រុក្ខមូលេ និសិន្នំ.

៥៦០. តមេនមវោច ឧបសង្កមិត្វា, អប្បាពាធំ ផាសុវិហារញ្ច បុច្ឆិ;

‘‘វេសាលិយំ លិច្ឆវិហំ ភទន្តេ, ជានន្តិ មំ លិច្ឆវិ អម្ពសក្ករោ.

៥៦១. ‘‘ឥមានិ មេ អដ្ឋ យុគា សុភានិ [យុគានិ ភន្តេ (ស្យា. ក.)], បដិគណ្ហ ភន្តេ បទទាមិ តុយ្ហំ;

តេនេវ អត្ថេន ឥធាគតោស្មិ, យថា អហំ អត្តមនោ ភវេយ្យ’’ន្តិ.

៥៦២. ‘‘ទូរតោវ សមណព្រាហ្មណា ច, និវេសនំ តេ បរិវជ្ជយន្តិ;

បត្តានិ ភិជ្ជន្តិ ច តេ [ភិជ្ជន្តិ តវ (ស្យា. ក.)] និវេសនេ, សង្ឃាដិយោ ចាបិ វិទាលយន្តិ [វិបាដយន្តិ (សី.), វិបាតយន្តិ (ក.)].

៥៦៣. ‘‘អថាបរេ បាទកុឋារិកាហិ, អវំសិរា សមណា បាតយន្តិ;

ឯតាទិសំ បព្ពជិតា វិហេសំ, តយា កតំ សមណា បាបុណន្តិ.

៥៦៤. ‘‘តិណេន តេលម្បិ ន ត្វំ អទាសិ, មូឡ្ហស្ស មគ្គម្បិ ន បាវទាសិ;

អន្ធស្ស ទណ្ឌំ សយមាទិយាសិ, ឯតាទិសោ កទរិយោ អសំវុតោ តុវំ;

អថ ត្វំ កេន វណ្ណេន កិមេវ ទិស្វា,

អម្ហេហិ សហ សំវិភាគំ ករោសី’’តិ.

៥៦៥. ‘‘បច្ចេមិ ភន្តេ យំ ត្វំ វទេសិ, វិហេសយិំ សមណេ ព្រាហ្មណេ ច;

ខិឌ្ឌត្ថិកោ នោ ច បទុដ្ឋចិត្តោ, ឯតម្បិ មេ ទុក្កដមេវ ភន្តេ.

៥៦៦. ‘‘ខិឌ្ឌាយ យក្ខោ បសវិត្វា បាបំ, វេទេតិ ទុក្ខំ អសមត្តភោគី;

ទហរោ យុវា នគ្គនិយស្ស ភាគី, កិំ សុ តតោ ទុក្ខតរស្ស ហោតិ.

៥៦៧. ‘‘តំ ទិស្វា សំវេគមលត្ថំ ភន្តេ, តប្បច្ចយា វាបិ [តប្បច្ចយា តាហំ (សី.), តប្បច្ចយា ចាហំ (បី.)] ទទាមិ ទានំ;

បដិគណ្ហ ភន្តេ វត្ថយុគានិ អដ្ឋ, យក្ខស្សិមា គច្ឆន្តុ ទក្ខិណាយោ’’តិ.

៥៦៨. ‘‘អទ្ធា ហិ ទានំ ពហុធា បសត្ថំ, ទទតោ ច តេ អក្ខយធម្មមត្ថុ;

បដិគណ្ហាមិ តេ វត្ថយុគានិ អដ្ឋ, យក្ខស្សិមា គច្ឆន្តុ ទក្ខិណាយោ’’តិ.

៥៦៩. តតោ ហិ សោ អាចមយិត្វា លិច្ឆវិ, ថេរស្ស ទត្វាន យុគានិ អដ្ឋ;

‘បដិគ្គហិតានិ ច តានិ អស្សុ, យក្ខញ្ច បស្សេថ សន្នទ្ធទុស្សំ’.

៥៧០. តមទ្ទសា ចន្ទនសារលិត្តំ, អាជញ្ញមារូឡ្ហមុឡារវណ្ណំ;

អលង្កតំ សាធុនិវត្ថទុស្សំ, បរិវារិតំ យក្ខមហិទ្ធិបត្តំ.

៥៧១. សោ តំ ទិស្វា អត្តមនា ឧទគ្គោ, បហដ្ឋចិត្តោ ច សុភគ្គរូបោ;

កម្មញ្ច ទិស្វាន មហាវិបាកំ, សន្ទិដ្ឋិកំ ចក្ខុនា សច្ឆិកត្វា.

៥៧២. តមេនមវោច ឧបសង្កមិត្វា, ‘‘ទស្សាមិ ទានំ សមណព្រាហ្មណានំ;

ន ចាបិ មេ កិញ្ចិ អទេយ្យមត្ថិ, តុវញ្ច មេ យក្ខ ពហូបការោ’’តិ.

៥៧៣. ‘‘តុវញ្ច មេ លិច្ឆវិ ឯកទេសំ, អទាសិ ទានានិ អមោឃមេតំ;

ស្វាហំ ករិស្សាមិ តយាវ សក្ខិំ, អមានុសោ មានុសកេន សទ្ធិ’’ន្តិ.

៥៧៤. ‘‘គតី ច ពន្ធូ ច បរាយណញ្ច [បរាយនញ្ច (ស្យា. ក.)], មិត្តោ មមាសិ អថ ទេវតា មេ [ទេវតាសិ (សី. ស្យា.)];

យាចាមិ តំ [យាចាមហំ (សី.)] បញ្ជលិកោ ភវិត្វា, ឥច្ឆាមិ តំ យក្ខ បុនាបិ ទដ្ឋុ’’ន្តិ.

៥៧៥. ‘‘សចេ តុវំ អស្សទ្ធោ ភវិស្សសិ, កទរិយរូបោ វិប្បដិបន្នចិត្តោ;

ត្វំ នេវ មំ លច្ឆសិ [តេនេវ មំ ន លច្ឆសី (សី.), តេនេវ មំ លិច្ឆវិ (ស្យា.), តេនេវ មំ លច្ឆសិ (ក.)] ទស្សនាយ, ទិស្វា ច តំ នោបិ ច អាលបិស្សំ.

៥៧៦. ‘‘សចេ បន ត្វំ ភវិស្សសិ ធម្មគារវោ, ទានេ រតោ សង្គហិតត្តភាវោ;

ឱបានភូតោ សមណព្រាហ្មណានំ, ឯវំ មមំ លច្ឆសិ ទស្សនាយ.

៥៧៧. ‘‘ទិស្វា ច តំ អាលបិស្សំ ភទន្តេ, ឥមញ្ច សូលតោ លហុំ បមុញ្ច;

យតោ និទានំ អករិម្ហ សក្ខិំ, មញ្ញាមិ សូលាវុតកស្ស ការណា.

៥៧៨. ‘‘តេ អញ្ញមញ្ញំ អករិម្ហ សក្ខិំ, អយញ្ច សូលតោ [សូលាវុតោ (សី. ស្យា.)] លហុំ បមុត្តោ;

សក្កច្ច ធម្មានិ សមាចរន្តោ, មុច្ចេយ្យ សោ និរយា ច តម្ហា;

កម្មំ សិយា អញ្ញត្រ វេទនីយំ.

៥៧៩. ‘‘កប្បិតកញ្ច ឧបសង្កមិត្វា, តេនេវ [តេន (ស្យា. ក.)] សហ សំវិភជិត្វា កាលេ;

សយំ មុខេនូបនិសជ្ជ បុច្ឆ, សោ តេ អក្ខិស្សតិ ឯតមត្ថំ.

៥៨០. ‘‘តមេវ ភិក្ខុំ ឧបសង្កមិត្វា, បុច្ឆស្សុ អញ្ញត្ថិកោ នោ ច បទុដ្ឋចិត្តោ;

សោ តេ សុតំ អសុតញ្ចាបិ ធម្មំ,

សព្ពម្បិ អក្ខិស្សតិ យថា បជាន’’ន្តិ.

៥៨១. សោ តត្ថ រហស្សំ សមុល្លបិត្វា, សក្ខិំ ករិត្វាន អមានុសេន;

បក្កាមិ សោ លិច្ឆវីនំ សកាសំ, អថ ព្រវិ បរិសំ សន្និសិន្នំ.

៥៨២. ‘‘សុណន្តុ ភោន្តោ មម ឯកវាក្យំ, វរំ វរិស្សំ លភិស្សាមិ អត្ថំ;

សូលាវុតោ បុរិសោ លុទ្ទកម្មោ, បណីហិតទណ្ឌោ [បណីតនណ្ឌោ (ក.)] អនុសត្តរូបោ [អនុបក្ករូបោ (ក.)].

៥៨៣. ‘‘ឯត្តាវតា វីសតិរត្តិមត្តា, យតោ អាវុតោ នេវ ជីវតិ ន មតោ;

តាហំ មោចយិស្សាមិ ទានិ, យថាមតិំ អនុជានាតុ សង្ឃោ’’តិ.

៥៨៤. ‘‘ឯតញ្ច អញ្ញញ្ច លហុំ បមុញ្ច, កោ តំ វទេថ [វទេថាតិ (ក.), វទេថ ច (ស្យា.)] តថា ករោន្តំ;

យថា បជានាសិ តថា ករោហិ, យថាមតិំ អនុជានាតិ សង្ឃោ’’តិ.

៥៨៥. សោ តំ បទេសំ ឧបសង្កមិត្វា, សូលាវុតំ មោចយិ ខិប្បមេវ;

‘មា ភាយិ សម្មា’តិ ច តំ អវោច, តិកិច្ឆកានញ្ច ឧបដ្ឋបេសិ.

៥៨៦. ‘‘កប្បិតកញ្ច ឧបសង្កមិត្វា, តេនេវ សហ [តេន សមំ (សី.), តេន សហ (ស្យា. ក.)] សំវិភជិត្វា កាលេ;

សយំ មុខេនូបនិសជ្ជ លិច្ឆវិ, តថេវ បុច្ឆិត្ថ នំ ការណត្ថិកោ.

៥៨៧. ‘‘សូលាវុតោ បុរិសោ លុទ្ទកម្មោ, បណីតទណ្ឌោ អនុសត្តរូបោ;

ឯត្តាវតា វីសតិរត្តិមត្តា, យតោ អាវុតោ នេវ ជីវតិ ន មតោ.

៥៨៨. ‘‘សោ មោចិតោ គន្ត្វា មយា ឥទានិ, ឯតស្ស យក្ខស្ស វចោ ហិ ភន្តេ;

សិយា នុ ខោ ការណំ កិញ្ចិទេវ, យេន សោ និរយំ នោ វជេយ្យ.