១០. ធាតុវិវណ្ណបេតវត្ថុ

៥០៧. ‘‘អន្តលិក្ខស្មិំ តិដ្ឋន្តោ, ទុគ្គន្ធោ បូតិ វាយសិ;

មុខញ្ច តេ កិមយោ បូតិគន្ធំ, ខាទន្តិ កិំ កម្មមកាសិ បុព្ពេ.

៥០៨. ‘‘តតោ សត្ថំ គហេត្វាន, ឱក្កន្តន្តិ បុនប្បុនំ;

ខារេន បរិប្ផោសិត្វា, ឱក្កន្តន្តិ បុនប្បុនំ.

៥០៩. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, ឥទំ ទុក្ខំ និគច្ឆសី’’តិ.

៥១០. ‘‘អហំ រាជគហេ រម្មេ, រមណីយេ គិរិព្ពជេ;

ឥស្សរោ ធនធញ្ញស្ស, សុបហូតស្ស មារិស.

៥១១. ‘‘តស្សាយំ មេ ភរិយា ច, ធីតា ច សុណិសា ច មេ;

តា មាលំ ឧប្បលញ្ចាបិ, បច្ចគ្ឃញ្ច វិលេបនំ;

ថូបំ ហរន្តិយោ វារេសិំ, តំ បាបំ បកតំ មយា.

៥១២. ‘‘ឆឡាសីតិសហស្សានិ, មយំ បច្ចត្តវេទនា;

ថូបបូជំ វិវណ្ណេត្វា, បច្ចាម និរយេ ភុសំ.

៥១៣. ‘‘យេ ច ខោ ថូបបូជាយ, វត្តន្តេ អរហតោ មហេ;

អាទីនវំ បកាសេន្តិ, វិវេចយេថ [វិវេចយថ (សី.)] នេ តតោ.

៥១៤. ‘‘ឥមា ច បស្ស អាយន្តិយោ, មាលធារី អលង្កតា;

មាលាវិបាកំនុភោន្តិយោ [អនុភវន្តិ (សី. បី.)], សមិទ្ធា ច តា [សមិទ្ធា តា (សី. ស្យា.)] យសស្សិនិយោ.

៥១៥. ‘‘តញ្ច ទិស្វាន អច្ឆេរំ, អព្ភុតំ លោមហំសនំ;

នមោ ករោន្តិ សប្បញ្ញា, វន្ទន្តិ តំ មហាមុនិំ.

៥១៦. ‘‘សោហំ នូន ឥតោ គន្ត្វា, យោនិំ លទ្ធាន មានុសិំ;

ថូបបូជំ ករិស្សាមិ, អប្បមត្តោ បុនប្បុន’’ន្តិ.

ធាតុវិវណ្ណបេតវត្ថុ ទសមំ.

ចូឡវគ្គោ តតិយោ និដ្ឋិតោ.