១. អភិជ្ជមានបេតវត្ថុ

៣៨៧. ‘‘អភិជ្ជមានេ វារិម្ហិ, គង្គាយ ឥធ គច្ឆសិ;

នគ្គោ បុព្ពទ្ធបេតោវ មាលធារី អលង្កតោ;

កុហិំ គមិស្សសិ បេត, កត្ថ វាសោ ភវិស្សតី’’តិ.

៣៨៨. ‘‘ចុន្ទដ្ឋិលំ [ចុន្ទដ្ឋិកំ (សី.)] គមិស្សាមិ, បេតោ សោ ឥតិ ភាសតិ;

អន្តរេ វាសភគាមំ, ពារាណសិំ ច [ពារាណសិយា ច (សី. ស្យា.)] សន្តិកេ’’.

៣៨៩. តញ្ច ទិស្វា មហាមត្តោ, កោលិយោ ឥតិ វិស្សុតោ;

សត្តុំ ភត្តញ្ច បេតស្ស, បីតកញ្ច យុគំ អទា.

៣៩០. នាវាយ តិដ្ឋមានាយ, កប្បកស្ស អទាបយិ;

កប្បកស្ស បទិន្នម្ហិ, ឋានេ បេតស្ស ទិស្សថ [បេតស្សុ’ទិស្សថ (សី.), បេតស្សុ’ទិច្ឆថ (?)].

៣៩១. តតោ សុវត្ថវសនោ, មាលធារី អលង្កតោ;

ឋានេ ឋិតស្ស បេតស្ស, ទក្ខិណា ឧបកប្បថ;

តស្មា ទជ្ជេថ បេតានំ, អនុកម្បាយ បុនប្បុនំ.

៣៩២. សាតុន្នវសនា [សាហុន្នវាសិនោ (ស្យា. បី.), សាហុន្ទវាសិនោ (ក.)] ឯកេ, អញ្ញេ កេសនិវាសនា [កេសនិវាសិនោ (ស្យា. ក.)];

បេតា ភត្តាយ គច្ឆន្តិ, បក្កមន្តិ ទិសោទិសំ.

៣៩៣. ទូរេ ឯកេ [ទូរេ បេតា (ក.)] បធាវិត្វា, អលទ្ធាវ និវត្តរេ;

ឆាតា បមុច្ឆិតា ភន្តា, ភូមិយំ បដិសុម្ភិតា.

៣៩៤. តេ ច [កេចិ (សី. ស្យា.)] តត្ថ បបតិតា [បបតិត្វា (សី.), ច បតិតា (ស្យា.)], ភូមិយំ បដិសុម្ភិតា;

បុព្ពេ អកតកល្យាណា, អគ្គិទឌ្ឍាវ អាតបេ.

៣៩៥. ‘‘មយំ បុព្ពេ បាបធម្មា, ឃរណី កុលមាតរោ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៣៩៦. ‘‘បហូតំ អន្នបានម្បិ, អបិស្សុ អវកិរីយតិ;

សម្មគ្គតេ បព្ពជិតេ, ន ច កិញ្ចិ អទម្ហសេ.

៣៩៧. ‘‘អកម្មកាមា អលសា, សាទុកាមា មហគ្ឃសា;

អាលោបបិណ្ឌទាតារោ, បដិគ្គហេ បរិភាសិម្ហសេ [បរិភាសិតា (ស្យា. ក.)].

៣៩៨. ‘‘តេ ឃរា តា ច ទាសិយោ, តានេវាភរណានិ នោ;

តេ អញ្ញេ បរិចារេន្តិ, មយំ ទុក្ខស្ស ភាគិនោ.

៣៩៩. ‘‘វេណី វា អវញ្ញា ហោន្តិ, រថការី ច ទុព្ភិកា;

ចណ្ឌាលី កបណា ហោន្តិ, កប្បកា [ន្ហាបិកា (សី.)] ច បុនប្បុនំ.

៤០០. ‘‘យានិ យានិ និហីនានិ, កុលានិ កបណានិ ច;

តេសុ តេស្វេវ ជាយន្តិ, ឯសា មច្ឆរិនោ គតិ.

៤០១. ‘‘បុព្ពេ ច កតកល្យាណា, ទាយកា វីតមច្ឆរា;

សគ្គំ តេ បរិបូរេន្តិ, ឱភាសេន្តិ ច នន្ទនំ.

៤០២. ‘‘វេជយន្តេ ច បាសាទេ, រមិត្វា កាមកាមិនោ;

ឧច្ចាកុលេសុ ជាយន្តិ, សភោគេសុ តតោ ចុតា.

៤០៣. ‘‘កូដាគារេ ច បាសាទេ, បល្លង្កេ គោនកត្ថតេ;

ពីជិតង្គា [វីជិតង្គា (សី. ស្យា.)] មោរហត្ថេហិ, កុលេ ជាតា យសស្សិនោ.

៤០៤. ‘‘អង្កតោ អង្កំ គច្ឆន្តិ, មាលធារី អលង្កតា;

ធាតិយោ ឧបតិដ្ឋន្តិ, សាយំ បាតំ សុខេសិនោ.

៤០៥. ‘‘នយិទំ អកតបុញ្ញានំ, កតបុញ្ញានមេវិទំ;

អសោកំ នន្ទនំ រម្មំ, តិទសានំ មហាវនំ.

៤០៦. ‘‘សុខំ អកតបុញ្ញានំ, ឥធ នត្ថិ បរត្ថ ច;

សុខញ្ច កតបុញ្ញានំ, ឥធ ចេវ បរត្ថ ច.

៤០៧. ‘‘តេសំ សហព្យកាមានំ, កត្តព្ពំ កុសលំ ពហុំ;

កតបុញ្ញា ហិ មោទន្តិ, សគ្គេ ភោគសមង្គិនោ’’តិ.

អភិជ្ជមានបេតវត្ថុ បឋមំ.