៤. នន្ទាបេតិវត្ថុ

១៦៨. ‘‘កាឡី ទុព្ពណ្ណរូបាសិ, ផរុសា ភីរុទស្សនា;

បិង្គលាសិ កឡារាសិ, ន តំ មញ្ញាមិ មានុសិ’’ន្តិ.

១៦៩. ‘‘អហំ នន្ទា នន្ទិសេន, ភរិយា តេ បុរេ អហុំ;

បាបកម្មំ ករិត្វាន, បេតលោកំ ឥតោ គតា’’តិ.

១៧០. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, បេតលោកំ ឥតោ គតា’’តិ.

១៧១. ‘‘ចណ្ឌី ច ផរុសា ចាសិំ [ចណ្ឌី ផរុសវាចា ច (សី.)], តយិ ចាបិ អគារវា;

តាហំ ទុរុត្តំ វត្វាន, បេតលោកំ ឥតោ គតា’’តិ.

១៧២. ‘‘ហន្ទុត្តរីយំ ទទាមិ តេ, ឥមំ [ឥទំ (សី. អដ្ឋ.)] ទុស្សំ និវាសយ;

ឥមំ ទុស្សំ និវាសេត្វា, ឯហិ នេស្សាមិ តំ ឃរំ.

១៧៣. ‘‘វត្ថញ្ច អន្នបានញ្ច, លច្ឆសិ ត្វំ ឃរំ គតា;

បុត្តេ ច តេ បស្សិស្សសិ, សុណិសាយោ ច ទក្ខសី’’តិ.

១៧៤. ‘‘ហត្ថេន ហត្ថេ តេ ទិន្នំ, ន មយ្ហំ ឧបកប្បតិ;

ភិក្ខូ ច សីលសម្បន្នេ, វីតរាគេ ពហុស្សុតេ.

១៧៥. ‘‘តប្បេហិ អន្នបានេន, មម ទក្ខិណមាទិស;

តទាហំ សុខិតា ហេស្សំ, សព្ពកាមសមិទ្ធិនី’’តិ.

១៧៦. សាធូតិ សោ បដិស្សុត្វា, ទានំ វិបុលមាកិរិ;

អន្នំ បានំ ខាទនីយំ, វត្ថសេនាសនានិ ច;

ឆត្តំ គន្ធញ្ច មាលញ្ច, វិវិធា ច ឧបាហនា.

១៧៧. ភិក្ខូ ច សីលសម្បន្នេ, វីតរាគេ ពហុស្សុតេ;

តប្បេត្វា អន្នបានេន, តស្សា ទក្ខិណមាទិសី.

១៧៨. សមនន្តរានុទ្ទិដ្ឋេ, វិបាកោ ឧទបជ្ជថ;

ភោជនច្ឆាទនបានីយំ, ទក្ខិណាយ ឥទំ ផលំ.

១៧៩. តតោ សុទ្ធា សុចិវសនា, កាសិកុត្តមធារិនី;

វិចិត្តវត្ថាភរណា, សាមិកំ ឧបសង្កមិ.

១៨០. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ឱភាសេន្តី ទិសា សព្ពា, ឱសធី វិយ តារកា.

១៨១. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១៨២. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១៨៣. ‘‘អហំ នន្ទា នន្ទិសេន, ភរិយា តេ បុរេ អហុំ;

បាបកម្មំ ករិត្វាន, បេតលោកំ ឥតោ គតា.

១៨៤. ‘‘តវ ទិន្នេន ទានេន, មោទាមិ អកុតោភយា;

ចិរំ ជីវ គហបតិ, សហ សព្ពេហិ ញាតិភិ;

អសោកំ វិរជំ ខេមំ, អាវាសំ វសវត្តិនំ.

១៨៥. ‘‘ឥធ ធម្មំ ចរិត្វាន, ទានំ ទត្វា គហបតិ;

វិនេយ្យ មច្ឆេរមលំ សមូលំ, អនិន្ទិតោ សគ្គមុបេហិ ឋាន’’ន្តិ.

នន្ទាបេតិវត្ថុ ចតុត្ថំ.