៦. បាដិហារិយកថា

៣០. ‘‘តីណិមានិ, ភិក្ខវេ [អ. និ. ៣.៦១ បស្សិតព្ពា], បាដិហារិយានិ. កតមានិ តីណិ? ឥទ្ធិបាដិហារិយំ, អាទេសនាបាដិហារិយំ, អនុសាសនីបាដិហារិយំ.

‘‘កតមញ្ច, ភិក្ខវេ, ឥទ្ធិបាដិហារិយំ? ឥធ, ភិក្ខវេ, ឯកច្ចោ អនេកវិហិតំ ឥទ្ធិវិធំ បច្ចនុភោតិ – ឯកោបិ ហុត្វា ពហុធា ហោតិ, ពហុធាបិ ហុត្វា ឯកោ ហោតិ; អាវិភាវំ តិរោភាវំ…បេ… យាវ ព្រហ្មលោកាបិ កាយេន វសំ វត្តេតិ. ឥទំ វុច្ចតិ, ភិក្ខវេ, ឥទ្ធិបាដិហារិយំ.

‘‘កតមញ្ច, ភិក្ខវេ, អាទេសនាបាដិហារិយំ? ឥធ, ភិក្ខវេ, ឯកច្ចោ និមិត្តេន អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ. សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា. ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, អបិ ច ខោ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ. សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា. ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, នបិ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ, អបិ ច ខោ វិតក្កយតោ វិចារយតោ វិតក្កវិប្ផារសទ្ទំ សុត្វា អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ. សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា. ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, នបិ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ, នបិ វិតក្កយតោ វិចារយតោ វិតក្កវិប្ផារសទ្ទំ សុត្វា អាទិសតិ, អបិ ច ខោ អវិតក្កំ អវិចារំ សមាធិំ សមាបន្នស្ស ចេតសា ចេតោ បរិច្ច បជានាតិ – ‘យថា ឥមស្ស ភោតោ មនោសង្ខារា បណិហិតា ឥមស្ស [តថា ឥមស្ស (ស្យា.), យថា ឥមស្ស (ក.) អ. និ. ៣.៦១ បស្សិតព្ពា] ចិត្តស្ស អនន្តរា អមុកំ នាម វិតក្កំ វិតក្កយិស្សតី’តិ [វិតក្កេស្សតីតិ (ស្យា.) អ. និ. ៣.៦១]. សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា. ឥទំ វុច្ចតិ, ភិក្ខវេ, អាទេសនាបាដិហារិយំ.

‘‘កតមញ្ច, ភិក្ខវេ, អនុសាសនីបាដិហារិយំ? ឥធ, ភិក្ខវេ, ឯកច្ចោ ឯវមនុសាសតិ – ‘ឯវំ វិតក្កេថ, មា ឯវំ វិតក្កយិត្ថ. ឯវំ មនសិ ករោថ, មា ឯវំ មនសិ ករិត្ថ. ឥទំ បជហថ, ឥទំ ឧបសម្បជ្ជ វិហរថា’តិ. ឥទំ វុច្ចតិ, ភិក្ខវេ, អនុសាសនីបាដិហារិយំ. ឥមានិ ខោ, ភិក្ខវេ, តីណិ បាដិហារិយានិ’’.

៣១. នេក្ខម្មំ ឥជ្ឈតីតិ – ឥទ្ធិ. កាមច្ឆន្ទំ បដិហរតីតិ – បាដិហារិយំ. យេ តេន នេក្ខម្មេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘តំ ខោ បន នេក្ខម្មំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

អព្យាបាទោ ឥជ្ឈតីតិ – ឥទ្ធិ. ព្យាបាទំ បដិហរតីតិ – បាដិហារិយំ. យេ តេន អព្យាបាទេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘សោ ខោ បន អព្យាបាទោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

អាលោកសញ្ញា ឥជ្ឈតីតិ – ឥទ្ធិ. ថិនមិទ្ធំ បដិហរតីតិ – បាដិហារិយំ. យេ តាយ អាលោកសញ្ញាយ សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘សា ខោ បន អាលោកសញ្ញា ឯវំ អាសេវិតព្ពា, ឯវំ ភាវេតព្ពា, ឯវំ ពហុលីកាតព្ពា, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

អវិក្ខេបោ ឥជ្ឈតីតិ – ឥទ្ធិ. ឧទ្ធច្ចំ បដិហរតីតិ – បាដិហារិយំ. យេ តេន អវិក្ខេបេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘សោ ខោ បន អវិក្ខេបោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

ធម្មវវត្ថានំ ឥជ្ឈតីតិ – ឥទ្ធិ. វិចិកិច្ឆំ បដិហរតីតិ – បាដិហារិយំ. យេ តេន ធម្មវវត្ថានេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘តំ ខោ បន ធម្មវវត្ថានំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា, សតិ ឧបដ្ឋាបេតព្ពា’’តិ – អនុសាសនីបាដិហារិយំ.

ញាណំ ឥជ្ឈតីតិ – ឥទ្ធិ. អវិជ្ជំ បដិហរតីតិ – បាដិហារិយំ. យេ តេន ញាណេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘តំ ខោ បន ញាណំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

បាមោជ្ជំ ឥជ្ឈតីតិ – ឥទ្ធិ. អរតិំ បដិហរតីតិ – បាដិហារិយំ. យេ តេន បាមោជ្ជេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘តំ ខោ បន បាមោជ្ជំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ…បេ….

បឋមំ ឈានំ ឥជ្ឈតីតិ – ឥទ្ធិ. នីវរណេ បដិហរតីតិ – បាដិហារិយំ. យេ តេន បឋមេន ឈានេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘តំ ខោ បន បឋមំ ឈានំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ…បេ….

អរហត្តមគ្គោ ឥជ្ឈតីតិ – ឥទ្ធិ. សព្ពកិលេសេ បដិហរតីតិ – បាដិហារិយំ. យេ តេន អរហត្តមគ្គេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ. ‘‘សោ ខោ បន អរហត្តមគ្គោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ.

៣២. នេក្ខម្មំ ឥជ្ឈតីតិ – ឥទ្ធិ. កាមច្ឆន្ទំ បដិហរតីតិ – បាដិហារិយំ. យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយំ. អព្យាបាទោ ឥជ្ឈតីតិ – ឥទ្ធិ. ព្យាបាទំ បដិហរតីតិ – បាដិហារិយំ. យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយំ. អាលោកសញ្ញា ឥជ្ឈតីតិ – ឥទ្ធិ. ថិនមិទ្ធំ បដិហរតីតិ – បាដិហារិយំ…បេ… អរហត្តមគ្គោ ឥជ្ឈតីតិ – ឥទ្ធិ. សព្ពកិលេសេ បដិហរតីតិ – បាដិហារិយំ. យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយន្តិ.

បាដិហារិយកថា និដ្ឋិតា.