៥. អភិញ្ញាទិវារោ

៣៤. ‘‘‘យាវតា អភិញ្ញាយ អភិញ្ញដ្ឋោ ញាតោ ទិដ្ឋោ វិទិតោ សច្ឆិកតោ ផស្សិតោ បញ្ញាយ. អផស្សិតោ បញ្ញាយ អភិញ្ញដ្ឋោ នត្ថី’តិ – ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ’’. អភិញ្ញាយ អភិញ្ញដ្ឋេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ.

‘‘‘យាវតា បរិញ្ញាយ បរិញ្ញដ្ឋោ…បេ… យាវតា បហានស្ស បហានដ្ឋោ…បេ… យាវតា ភាវនាយ ភាវនដ្ឋោ…បេ… យាវតា សច្ឆិកិរិយាយ សច្ឆិកិរិយដ្ឋោ ញាតោ ទិដ្ឋោ វិទិតោ សច្ឆិកតោ ផស្សិតោ បញ្ញាយ. អផស្សិតោ បញ្ញាយ សច្ឆិកិរិយដ្ឋោ នត្ថី’តិ – ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ’’. សច្ឆិកិរិយាយ សច្ឆិកិរិយដ្ឋេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ.

អភិញ្ញាយ អភិញ្ញដ្ឋេ, បរិញ្ញាយ បរិញ្ញដ្ឋេ, បហានាយ បហានដ្ឋេ, ភាវនាយ ភាវនដ្ឋេ, សច្ឆិកិរិយាយ សច្ឆិកិរិយដ្ឋេ បញ្ចវីសសតំ ធម្មា, បញ្ចវីសសតំ អត្ថា, អឌ្ឍតេយ្យានិ និរុត្តិសតានិ, បញ្ច ញាណសតានិ.