៣. ឥទ្ធិបាទវារោ

៣២. ‘‘អយំ ឆន្ទសមាធិបធានសង្ខារសមន្នាគតោ ឥទ្ធិបាទោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. សោ ខោ បនាយំ ឆន្ទសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ មេ, ភិក្ខវេ…បេ… ភាវិតោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

‘‘អយំ វីរិយសមាធិ…បេ… អយំ ចិត្តសមាធិ…បេ… អយំ វីមំសាសមាធិបធានសង្ខារសមន្នាគតោ ឥទ្ធិបាទោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. សោ ខោ បនាយំ វីមំសាសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ’’.

[ក] ‘‘‘អយំ ឆន្ទសមាធិបធានសង្ខារសមន្នាគតោ ឥទ្ធិបាទោ’តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… សោ ខោ បនាយំ ឆន្ទសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ…បេ… ភាវិតោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ’’.

ចក្ខុំ ឧទបាទីតិ – កេនដ្ឋេន? ញាណំ ឧទបាទីតិ – កេនដ្ឋេន? បញ្ញា ឧទបាទីតិ – កេនដ្ឋេន? វិជ្ជា ឧទបាទីតិ – កេនដ្ឋេន? អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន. ញាណំ ឧទបាទីតិ – ញាតដ្ឋេន. បញ្ញា ឧទបាទីតិ – បជាននដ្ឋេន. វិជ្ជា ឧទបាទីតិ – បដិវេធដ្ឋេន. អាលោកោ ឧទបាទីតិ – ឱភាសដ្ឋេន.

ចក្ខុំ ធម្មោ, ញាណំ ធម្មោ, បញ្ញា ធម្មោ, វិជ្ជា ធម្មោ, អាលោកោ ធម្មោ. ឥមេ បញ្ច ធម្មា ធម្មបដិសម្ភិទាយ អារម្មណា ចេវ ហោន្តិ គោចរា ច. យេ តស្សា អារម្មណា តេ តស្សា គោចរា. យេ តស្សា គោចរា តេ តស្សា អារម្មណា. តេន វុច្ចតិ – ‘‘ធម្មេសុ ញាណំ ធម្មបដិសម្ភិទា’’.

ទស្សនដ្ឋោ អត្ថោ, ញាតដ្ឋោ អត្ថោ, បជាននដ្ឋោ អត្ថោ, បដិវេធដ្ឋោ អត្ថោ, ឱភាសដ្ឋោ អត្ថោ. ឥមេ បញ្ច អត្ថា អត្ថបដិសម្ភិទាយ អារម្មណា ចេវ ហោន្តិ គោចរា ច. យេ តស្សា អារម្មណា តេ តស្សា គោចរា. យេ តស្សា គោចរា តេ តស្សា អារម្មណា. តេន វុច្ចតិ – ‘‘អត្ថេសុ ញាណំ អត្ថបដិសម្ភិទា’’.

បញ្ច ធម្មេ សន្ទស្សេតុំ ព្យញ្ជននិរុត្តាភិលាបា, បញ្ច អត្ថេ សន្ទស្សេតុំ ព្យញ្ជននិរុត្តាភិលាបា. ឥមា ទស និរុត្តិយោ និរុត្តិបដិសម្ភិទាយ អារម្មណា ចេវ ហោន្តិ គោចរា ច. យេ តស្សា អារម្មណា តេ តស្សា គោចរា. យេ តស្សា គោចរា តេ តស្សា អារម្មណា. តេន វុច្ចតិ – ‘‘និរុត្តីសុ ញាណំ និរុត្តិបដិសម្ភិទា’’.

បញ្ចសុ ធម្មេសុ ញាណានិ, បញ្ចសុ អត្ថេសុ ញាណានិ, ទសសុ និរុត្តីសុ ញាណានិ. ឥមានិ វីសតិ ញាណានិ បដិភានបដិសម្ភិទាយ អារម្មណា ចេវ ហោន្តិ គោចរា ច. យេ តស្សា អារម្មណា តេ តស្សា គោចរា. យេ តស្សា គោចរា តេ តស្សា អារម្មណា. តេន វុច្ចតិ – ‘‘បដិភានេសុ ញាណំ បដិភានបដិសម្ភិទា’’.

ឆន្ទសមាធិបធានសង្ខារសមន្នាគតេ ឥទ្ធិបាទេ បន្នរស ធម្មា, បន្នរស អត្ថា, តិំស និរុត្តិយោ, សដ្ឋិ ញាណានិ.

[ខ-ឃ] ‘‘អយំ វីរិយសមាធិ…បេ… អយំ ចិត្តសមាធិ…បេ… អយំ វីមំសាសមាធិបធានសង្ខារសមន្នាគតោ ឥទ្ធិបាទោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… សោ ខោ បនាយំ វីមំសាសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ…បេ… ភាវិតោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ…’’.

វីមំសាសមាធិបធានសង្ខារសមន្នាគតេ ឥទ្ធិបាទេ បន្នរស ធម្មា, បន្នរស អត្ថា, តិំស និរុត្តិយោ, សដ្ឋិ ញាណានិ.

ចតូសុ ឥទ្ធិបាទេសុ សដ្ឋិ ធម្មា, សដ្ឋិ អត្ថា, វីសតិសតនិរុត្តិយោ, ចត្តាលីសញ្ច ទ្វេ ច ញាណសតានិ.