១. ឥន្ទ្រិយវារោ

២៣. សព្ពេសំ សត្តានំ បីឡនំ វជ្ជេត្វា អបីឡនាយ, ឧបឃាតំ វជ្ជេត្វា អនុបឃាតេន, សន្តាបំ វជ្ជេត្វា អសន្តាបេន, បរិយាទានំ វជ្ជេត្វា អបរិយាទានេន, វិហេសំ វជ្ជេត្វា អវិហេសាយ, សព្ពេ សត្តា អវេរិនោ ហោន្តុ មា វេរិនោ, សុខិនោ ហោន្តុ មា ទុក្ខិនោ, សុខិតត្តា ហោន្តុ មា ទុក្ខិតត្តាតិ – ឥមេហិ អដ្ឋហាការេហិ សព្ពេ សត្តេ មេត្តាយតីតិ – មេត្តា. តំ ធម្មំ ចេតយតីតិ – ចេតោ. សព្ពព្យាបាទបរិយុដ្ឋានេហិ វិមុច្ចតីតិ – វិមុត្តិ. មេត្តា ច ចេតោ ច វិមុត្តិ ចាតិ – មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សទ្ធាយ អធិមុច្ចតិ. សទ្ធិន្ទ្រិយបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – វីរិយំ បគ្គណ្ហាតិ. វីរិយិន្ទ្រិយបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សតិំ ឧបដ្ឋាបេតិ. សតិន្ទ្រិយបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – ចិត្តំ សមាទហតិ. សមាធិន្ទ្រិយបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – បញ្ញាយ បជានាតិ. បញ្ញិន្ទ្រិយបរិភាវិតា ហោតិ មេត្តាចេតោវិមុត្តិ.

ឥមានិ បញ្ចិន្ទ្រិយានិ មេត្តាយ ចេតោវិមុត្តិយា អាសេវនា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ អាសេវីយតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា ភាវនា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ ភាវីយតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា ពហុលីកតា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ ពហុលីករីយតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា អលង្ការា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ ស្វាលង្កតា ហោតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា បរិក្ខារា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ សុបរិក្ខតា ហោតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា បរិវារា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ សុបរិវុតា ហោតិ. ឥមានិ បញ្ចិន្ទ្រិយានិ មេត្តាយ ចេតោវិមុត្តិយា អាសេវនា ហោន្តិ, ភាវនា ហោន្តិ, ពហុលីកតា ហោន្តិ, អលង្ការា ហោន្តិ, បរិក្ខារា ហោន្តិ, បរិវារា ហោន្តិ, បារិបូរី ហោន្តិ, សហគតា ហោន្តិ, សហជាតា ហោន្តិ, សំសដ្ឋា ហោន្តិ, សម្បយុត្តា ហោន្តិ, បក្ខន្ទនា ហោន្តិ, បសីទនា [សំសីទនា (ក. សី. អដ្ឋ.)] ហោន្តិ, សន្តិដ្ឋនា ហោន្តិ, វិមុច្ចនា ហោន្តិ, ‘‘ឯតំ សន្ត’’ន្តិ ផស្សនា ហោន្តិ, យានីកតា ហោន្តិ, វត្ថុកតា ហោន្តិ, អនុដ្ឋិតា ហោន្តិ, បរិចិតា ហោន្តិ, សុសមារទ្ធា ហោន្តិ, សុភាវិតា ហោន្តិ, ស្វាធិដ្ឋិតា ហោន្តិ, សុសមុគ្គតា ហោន្តិ, សុវិមុត្តា ហោន្តិ, និព្ពត្តេន្តិ ជោតេន្តិ បតាបេន្តិ.