២. សោឡសញាណនិទ្ទេសោ

១៥៣. ឥមេហិ សោឡសហិ អាការេហិ ឧទុចិត្តំ ចិត្តំ សមុទុចិតំ ចិត្តំ ឯកត្តេ សន្តិដ្ឋតិ, នីវរណេហិ វិសុជ្ឈតិ. កតមេ តេ ឯកត្តា? នេក្ខម្មំ ឯកត្តំ, អព្យាបាទោ ឯកត្តំ, អាលោកសញ្ញា ឯកត្តំ, អវិក្ខេបោ ឯកត្តំ, ធម្មវវត្ថានំ ឯកត្តំ, ញាណំ ឯកត្តំ, បាមោជ្ជំ ឯកត្តំ, សព្ពេបិ កុសលា ធម្មា ឯកត្តា.

នីវរណាតិ, កតមេ តេ នីវរណា? កាមច្ឆន្ទោ នីវរណំ, ព្យាបាទោ នីវរណំ, ថិនមិទ្ធំ នីវរណំ, ឧទ្ធច្ចកុក្កុច្ចំ នីវរណំ, វិចិកិច្ឆា នីវរណំ, អវិជ្ជា នីវរណំ, អរតិ នីវរណំ, សព្ពេបិ អកុសលា ធម្មា នីវរណា.

នីវរណាតិ, កេនដ្ឋេន នីវរណា? និយ្យានាវរណដ្ឋេន នីវរណា. កតមេ តេ និយ្យានា? នេក្ខម្មំ អរិយានំ និយ្យានំ. តេន ច នេក្ខម្មេន អរិយា និយ្យន្តិ. កាមច្ឆន្ទោ និយ្យានាវរណំ. តេន ច កាមច្ឆន្ទេន និវុតត្តា នេក្ខម្មំ អរិយានំ និយ្យានំ នប្បជានាតីតិ – កាមច្ឆន្ទោ និយ្យានាវរណំ. អព្យាបាទោ អរិយានំ និយ្យានំ. តេន ច អព្យាបាទេន អរិយា និយ្យន្តិ. ព្យាបាទោ និយ្យានាវរណំ. តេន ច ព្យាបាទេន និវុតត្តា អព្យាបាទំ អរិយានំ និយ្យានំ នប្បជានាតីតិ – ព្យាបាទោ និយ្យានាវរណំ. អាលោកសញ្ញា អរិយានំ និយ្យានំ. តាយ ច អាលោកសញ្ញាយ អរិយា និយ្យន្តិ. ថិនមិទ្ធំ និយ្យានាវរណំ. តេន ច ថិនមិទ្ធេន និវុតត្តា អាលោកសញ្ញំ អរិយានំ និយ្យានំ នប្បជានាតីតិ – ថិនមិទ្ធំ និយ្យានាវរណំ. អវិក្ខេបោ អរិយានំ និយ្យានំ. តេន ច អវិក្ខេបេន អរិយា និយ្យន្តិ. ឧទ្ធច្ចំ និយ្យានាវរណំ. តេន ច ឧទ្ធច្ចេន និវុតត្តា អវិក្ខេបំ អរិយានំ និយ្យានំ នប្បជានាតីតិ – ឧទ្ធច្ចំ និយ្យានាវរណំ. ធម្មវវត្ថានំ អរិយានំ និយ្យានំ. តេន ច ធម្មវវត្ថានេន អរិយា និយ្យន្តិ. វិចិកិច្ឆា និយ្យានាវរណំ. តាយ ច វិចិកិច្ឆាយ និវុតត្តា ធម្មវវត្ថានំ អរិយានំ និយ្យានំ នប្បជានាតីតិ – វិចិកិច្ឆា និយ្យានាវរណំ. ញាណំ អរិយានំ និយ្យានំ. តេន ច ញាណេន អរិយា និយ្យន្តិ. អវិជ្ជា និយ្យានាវរណំ. តាយ ច អវិជ្ជាយ និវុតត្តា ញាណំ អរិយានំ និយ្យានំ នប្បជានាតីតិ – អវិជ្ជា និយ្យានាវរណំ. បាមោជ្ជំ អរិយានំ និយ្យានំ. តេន ច បាមោជ្ជេន អរិយា និយ្យន្តិ. អរតិ និយ្យានាវរណំ. តាយ ច អរតិយា និវុតត្តា បាមោជ្ជំ អរិយានំ និយ្យានំ នប្បជានាតីតិ – អរតិ និយ្យានាវរណំ. សព្ពេបិ កុសលា ធម្មា អរិយានំ និយ្យានំ. តេហិ ច កុសលេហិ ធម្មេហិ អរិយា និយ្យន្តិ. សព្ពេបិ អកុសលា ធម្មា និយ្យានាវរណា. តេហិ ច អកុសលេហិ ធម្មេហិ និវុតត្តា កុសលេ ធម្មេ អរិយានំ និយ្យានំ នប្បជានាតីតិ – សព្ពេបិ អកុសលា ធម្មា និយ្យានាវរណា. ឥមេហិ ច បន នីវរណេហិ វិសុទ្ធចិត្តស្ស សោឡសវត្ថុកំ អានាបានស្សតិសមាធិំ ភាវយតោ ខណិកសមោធានា.

សោឡសញាណនិទ្ទេសោ ទុតិយោ.