៥. សស្សតទិដ្ឋិនិទ្ទេសោ

១៣៨. សក្កាយវត្ថុកាយ សស្សតទិដ្ឋិយា កតមេហិ បន្នរសហិ អាការេហិ អភិនិវេសោ ហោតិ? ឥធ អស្សុតវា បុថុជ្ជនោ អរិយានំ អទស្សាវី អរិយធម្មស្ស អកោវិទោ អរិយធម្មេ អវិនីតោ សប្បុរិសានំ អទស្សាវី សប្បុរិសធម្មស្ស អកោវិទោ សប្បុរិសធម្មេ អវិនីតោ រូបវន្តំ វា អត្តានំ អត្តនិ វា រូបំ រូបស្មិំ វា អត្តានំ. វេទនាវន្តំ វា អត្តានំ…បេ… សញ្ញាវន្តំ វា អត្តានំ… សង្ខារវន្តំ វា អត្តានំ… វិញ្ញាណវន្តំ វា អត្តានំ អត្តនិ វា វិញ្ញាណំ វិញ្ញាណស្មិំ វា អត្តានំ.

កថំ រូបវន្តំ អត្តានំ សមនុបស្សតិ? ឥធេកច្ចោ វេទនំ… សញ្ញំ… សង្ខារេ… វិញ្ញាណំ អត្តតោ សមនុបស្សតិ. តស្ស ឯវំ ហោតិ – ‘‘អយំ ខោ មេ អត្តា. សោ ខោ បន មេ អយំ អត្តា ឥមិនា រូបេន រូបវា’’តិ. រូបវន្តំ អត្តានំ សមនុបស្សតិ. សេយ្យថាបិ រុក្ខោ ឆាយាសម្បន្នោ អស្ស. តមេនំ បុរិសោ ឯវំ វទេយ្យ – ‘‘អយំ រុក្ខោ, អយំ ឆាយា; អញ្ញោ រុក្ខោ, អញ្ញា ឆាយា. សោ ខោ បនាយំ រុក្ខោ ឥមាយ ឆាយាយ ឆាយាវា’’តិ. ឆាយាវន្តំ រុក្ខំ សមនុបស្សតិ. ឯវមេវំ ឥធេកច្ចោ វេទនំ…បេ… អយំ បឋមា សក្កាយវត្ថុកា សស្សតទិដ្ឋិ. សស្សតទិដ្ឋិ មិច្ឆាទិដ្ឋិ…បេ… ឥមានិ សញ្ញោជនានិ, ន ច ទិដ្ឋិយោ. ឯវំ រូបវន្តំ អត្តានំ សមនុបស្សតិ…បេ… សក្កាយវត្ថុកាយ សស្សតទិដ្ឋិយា ឥមេហិ បន្នរសហិ អាការេហិ អភិនិវេសោ ហោតិ.

សស្សតទិដ្ឋិនិទ្ទេសោ បញ្ចមោ.