៤៣. បទេសវិហារញាណនិទ្ទេសោ

៩៤. កថំ សមោទហនេ បញ្ញា បទេសវិហារេ ញាណំ? មិច្ឆាទិដ្ឋិបច្ចយាបិ វេទយិតំ, មិច្ឆាទិដ្ឋិវូបសមបច្ចយាបិ វេទយិតំ. សម្មាទិដ្ឋិបច្ចយាបិ វេទយិតំ, សម្មាទិដ្ឋិវូបសមបច្ចយាបិ វេទយិតំ. មិច្ឆាសង្កប្បបច្ចយាបិ វេទយិតំ, មិច្ឆាសង្កប្បវូបសមបច្ចយាបិ វេទយិតំ. សម្មាសង្កប្បបច្ចយាបិ វេទយិតំ, សម្មាសង្កប្បវូបសមបច្ចយាបិ វេទយិតំ…បេ… មិច្ឆាវិមុត្តិបច្ចយាបិ វេទយិតំ, មិច្ឆាវិមុត្តិវូបសមបច្ចយាបិ វេទយិតំ. សម្មាវិមុត្តិបច្ចយាបិ វេទយិតំ, សម្មាវិមុត្តិវូបសមបច្ចយាបិ វេទយិតំ. ឆន្ទបច្ចយាបិ វេទយិតំ, ឆន្ទវូបសមបច្ចយាបិ វេទយិតំ. វិតក្កបច្ចយាបិ វេទយិតំ, វិតក្កវូបសមបច្ចយាបិ វេទយិតំ. សញ្ញាបច្ចយាបិ វេទយិតំ, សញ្ញាវូបសមបច្ចយាបិ វេទយិតំ.

ឆន្ទោ ច អវូបសន្តោ ហោតិ, វិតក្កោ ច អវូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ. ឆន្ទោ ច វូបសន្តោ ហោតិ, វិតក្កោ ច អវូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ. ឆន្ទោ ច វូបសន្តោ ហោតិ, វិតក្កោ ច វូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ. ឆន្ទោ ច វូបសន្តោ ហោតិ, វិតក្កោ ច វូបសន្តោ ហោតិ, សញ្ញា ច វូបសន្តា ហោតិ, តប្បច្ចយាបិ វេទយិតំ. អប្បត្តស្ស បត្តិយា អត្ថិ អាសវំ, តស្មិម្បិ ឋានេ អនុប្បត្តេ តប្បច្ចយាបិ វេទយិតំ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘សមោទហនេ បញ្ញា បទេសវិហារេ ញាណំ’’.

បទេសវិហារញាណនិទ្ទេសោ តេចត្តាលីសមោ.