៤០. ទស្សនវិសុទ្ធិញាណនិទ្ទេសោ

៩១. កថំ សព្ពធម្មានំ ឯកសង្គហតានានត្តេកត្តបដិវេធេ បញ្ញា ទស្សនវិសុទ្ធិញាណំ? សព្ពធម្មានន្តិ បញ្ចក្ខន្ធា…បេ… អបរិយាបន្នា ធម្មា.

ឯកសង្គហតាតិ ទ្វាទសហិ អាការេហិ សព្ពេ ធម្មា ឯកសង្គហិតា. តថដ្ឋេន, អនត្តដ្ឋេន, សច្ចដ្ឋេន, បដិវេធដ្ឋេន, អភិជាននដ្ឋេន, បរិជាននដ្ឋេន, ធម្មដ្ឋេន, ធាតុដ្ឋេន, ញាតដ្ឋេន, សច្ឆិកិរិយដ្ឋេន, ផុសនដ្ឋេន, អភិសមយដ្ឋេន – ឥមេហិ ទ្វាទសហិ អាការេហិ សព្ពេ ធម្មា ឯកសង្គហិតា.

នានត្តេកត្តន្តិ កាមច្ឆន្ទោ នានត្តំ, នេក្ខម្មំ ឯកត្តំ…បេ… សព្ពកិលេសា នានត្តំ, អរហត្តមគ្គោ ឯកត្តំ.

បដិវេធេតិ ទុក្ខសច្ចំ បរិញ្ញាបដិវេធំ បដិវិជ្ឈតិ. សមុទយសច្ចំ បហានបដិវេធំ បដិវិជ្ឈតិ. និរោធសច្ចំ សច្ឆិកិរិយាបដិវេធំ បដិវិជ្ឈតិ. មគ្គសច្ចំ ភាវនាបដិវេធំ បដិវិជ្ឈតិ.

ទស្សនវិសុទ្ធីតិ សោតាបត្តិមគ្គក្ខណេ ទស្សនំ វិសុជ្ឈតិ; សោតាបត្តិផលក្ខណេ ទស្សនំ វិសុទ្ធំ. សកទាគាមិមគ្គក្ខណេ ទស្សនំ វិសុជ្ឈតិ; សកទាគាមិផលក្ខណេ ទស្សនំ វិសុទ្ធំ. អនាគាមិមគ្គក្ខណេ ទស្សនំ វិសុជ្ឈតិ; អនាគាមិផលក្ខណេ ទស្សនំ វិសុទ្ធំ. អរហត្តមគ្គក្ខណេ ទស្សនំ វិសុជ្ឈតិ; អរហត្តផលក្ខណេ ទស្សនំ វិសុទ្ធំ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘សព្ពធម្មានំ ឯកសង្គហតានានត្តេកត្តបដិវេធេ បញ្ញា ទស្សនវិសុទ្ធិញាណំ’’.

ទស្សនវិសុទ្ធិញាណនិទ្ទេសោ ចត្តាលីសមោ.