៣៩. អត្ថសន្ទស្សនញាណនិទ្ទេសោ

៩០. កថំ នានាធម្មប្បកាសនតា បញ្ញា អត្ថសន្ទស្សនេ ញាណំ? នានាធម្មាតិ បញ្ចក្ខន្ធា, ទ្វាទសាយតនានិ, អដ្ឋារស ធាតុយោ, កុសលា ធម្មា, អកុសលា ធម្មា, អព្យាកតា ធម្មា, កាមាវចរា ធម្មា, រូបាវចរា ធម្មា, អរូបាវចរា ធម្មា, អបរិយាបន្នា ធម្មា.

បកាសនតាតិ រូបំ អនិច្ចតោ បកាសេតិ, រូបំ ទុក្ខតោ បកាសេតិ, រូបំ អនត្តតោ បកាសេតិ. វេទនំ…បេ… សញ្ញំ… សង្ខារេ… វិញ្ញាណំ… ចក្ខុំ…បេ… ជរាមរណំ អនិច្ចតោ បកាសេតិ, ជរាមរណំ ទុក្ខតោ បកាសេតិ, ជរាមរណំ អនត្តតោ បកាសេតិ.

អត្ថសន្ទស្សនេតិ កាមច្ឆន្ទំ បជហន្តោ នេក្ខម្មត្ថំ សន្ទស្សេតិ. ព្យាបាទំ បជហន្តោ អព្យាបាទត្ថំ សន្ទស្សេតិ. ថិនមិទ្ធំ បជហន្តោ អាលោកសញ្ញត្ថំ សន្ទស្សេតិ. ឧទ្ធច្ចំ បជហន្តោ អវិក្ខេបត្ថំ សន្ទស្សេតិ. វិចិកិច្ឆំ បជហន្តោ ធម្មវវត្ថានត្ថំ សន្ទស្សេតិ. អវិជ្ជំ បជហន្តោ ញាណត្ថំ សន្ទស្សេតិ. អរតិំ បជហន្តោ បាមោជ្ជត្ថំ សន្ទស្សេតិ. នីវរណេ បជហន្តោ បឋមឈានត្ថំ សន្ទស្សេតិ …បេ… សព្ពកិលេសេ បជហន្តោ អរហត្តមគ្គត្ថំ សន្ទស្សេតិ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘នានាធម្មបកាសនតា បញ្ញា អត្ថសន្ទស្សនេ ញាណំ’’.

អត្ថសន្ទស្សនញាណនិទ្ទេសោ នវតិំសតិមោ.