៣៥. បរិនិព្ពានញាណនិទ្ទេសោ

៨៦. កថំ សម្បជានស្ស បវត្តបរិយាទានេ បញ្ញា បរិនិព្ពានេ ញាណំ? ឥធ សម្បជានោ នេក្ខម្មេន កាមច្ឆន្ទស្ស បវត្តំ បរិយាទិយតិ, អព្យាបាទេន ព្យាបាទស្ស បវត្តំ បរិយាទិយតិ, អាលោកសញ្ញាយ ថិនមិទ្ធស្ស បវត្តំ បរិយាទិយតិ, អវិក្ខេបេន ឧទ្ធច្ចស្ស បវត្តំ បរិយាទិយតិ, ធម្មវវត្ថានេន វិចិកិច្ឆាយ…បេ… ញាណេន អវិជ្ជាយ… បាមោជ្ជេន អរតិយា … បឋមេន ឈានេន នីវរណានំ បវត្តំ បរិយាទិយតិ…បេ… អរហត្តមគ្គេន សព្ពកិលេសានំ បវត្តំ បរិយាទិយតិ.

អថ វា បន សម្បជានស្ស អនុបាទិសេសាយ និព្ពានធាតុយា បរិនិព្ពាយន្តស្ស ឥទញ្ចេវ ចក្ខុបវត្តំ បរិយាទិយតិ, អញ្ញញ្ច ចក្ខុបវត្តំ ន ឧប្បជ្ជតិ. ឥទញ្ចេវ សោតបវត្តំ…បេ… ឃានបវត្តំ… ជិវ្ហាបវត្តំ… កាយបវត្តំ… មនោបវត្តំ បរិយាទិយតិ, អញ្ញញ្ច មនោបវត្តំ ន ឧប្បជ្ជតិ. ឥទំ សម្បជានស្ស បវត្តបរិយាទានេ បញ្ញា បរិនិព្ពានេ ញាណំ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘សម្បជានស្ស បវត្តបរិយាទានេ បញ្ញា បរិនិព្ពានេ ញាណំ’’.

បរិនិព្ពានញាណនិទ្ទេសោ បញ្ចតិំសតិមោ.