៣៦. សមសីសដ្ឋញាណនិទ្ទេសោ

៨៧. កថំ សព្ពធម្មានំ សម្មា សមុច្ឆេទេ និរោធេ ច អនុបដ្ឋានតា បញ្ញា សមសីសដ្ឋេ ញាណំ? សព្ពធម្មានន្តិ – បញ្ចក្ខន្ធា, ទ្វាទសាយតនានិ, អដ្ឋារស ធាតុយោ, កុសលា ធម្មា, អកុសលា ធម្មា, អព្យាកតា ធម្មា, កាមាវចរា ធម្មា, រូបាវចរា ធម្មា, អរូបាវចរា ធម្មា, អបរិយាបន្នា ធម្មា. សម្មា សមុច្ឆេទេតិ នេក្ខម្មេន កាមច្ឆន្ទំ សម្មា សមុច្ឆិន្ទតិ. អព្យាបាទេន ព្យាបាទំ សម្មា សមុច្ឆិន្ទតិ. អាលោកសញ្ញាយ ថិនមិទ្ធំ សម្មា សមុច្ឆិន្ទតិ. អវិក្ខេបេន ឧទ្ធច្ចំ សម្មា សមុច្ឆិន្ទតិ. ធម្មវវត្ថានេន វិចិកិច្ឆំ សម្មា សមុច្ឆិន្ទតិ. ញាណេន អវិជ្ជំ សម្មា សមុច្ឆិន្ទតិ. បាមោជ្ជេន អរតិំ សម្មា សមុច្ឆិន្ទតិ. បឋមេន ឈានេន នីវរណេ សម្មា សមុច្ឆិន្ទតិ…បេ… អរហត្តមគ្គេន សព្ពកិលេសេ សម្មា សមុច្ឆិន្ទតិ.

និរោធេតិ នេក្ខម្មេន កាមច្ឆន្ទំ និរោធេតិ. អព្យាបាទេន ព្យាបាទំ និរោធេតិ. អាលោកសញ្ញាយ ថិនមិទ្ធំ និរោធេតិ. អវិក្ខេបេន ឧទ្ធច្ចំ និរោធេតិ. ធម្មវវត្ថានេន វិចិកិច្ឆំ និរោធេតិ. ញាណេន អវិជ្ជំ និរោធេតិ. បាមោជ្ជេន អរតិំ និរោធេតិ. បឋមេន ឈានេន នីវរណេ និរោធេតិ…បេ… អរហត្តមគ្គេន សព្ពកិលេសេ និរោធេតិ.

អនុបដ្ឋានតាតិ នេក្ខម្មំ បដិលទ្ធស្ស កាមច្ឆន្ទោ ន ឧបដ្ឋាតិ. អព្យាបាទំ បដិលទ្ធស្ស ព្យាបាទោ ន ឧបដ្ឋាតិ. អាលោកសញ្ញំ បដិលទ្ធស្ស ថិនមិទ្ធំ ន ឧបដ្ឋាតិ. អវិក្ខេបំ បដិលទ្ធស្ស ឧទ្ធច្ចំ ន ឧបដ្ឋាតិ. ធម្មវវត្ថានំ បដិលទ្ធស្ស វិចិកិច្ឆា ន ឧបដ្ឋាតិ. ញាណំ បដិលទ្ធស្ស អវិជ្ជា ន ឧបដ្ឋាតិ. បាមោជ្ជំ បដិលទ្ធស្ស អរតិ ន ឧបដ្ឋាតិ. បឋមំ ឈានំ បដិលទ្ធស្ស នីវរណា ន ឧបដ្ឋហន្តិ…បេ… អរហត្តមគ្គំ បដិលទ្ធស្ស សព្ពកិលេសា ន ឧបដ្ឋហន្តិ.

សមន្តិ កាមច្ឆន្ទស្ស បហីនត្តា នេក្ខម្មំ សមំ. ព្យាបាទស្ស បហីនត្តា អព្យាបាទោ សមំ. ថិនមិទ្ធស្ស បហីនត្តា អាលោកសញ្ញា សមំ. ឧទ្ធច្ចស្ស បហីនត្តា អវិក្ខេបោ សមំ. វិចិកិច្ឆាយ បហីនត្តា ធម្មវវត្ថានំ សមំ. អវិជ្ជាយ បហីនត្តា ញាណំ សមំ. អរតិយា បហីនត្តា បាមោជ្ជំ សមំ. នីវរណានំ បហីនត្តា បឋមំ ឈានំ សមំ…បេ… សព្ពកិលេសានំ បហីនត្តា អរហត្តមគ្គោ សមំ.

សីសន្តិ តេរស សីសានិ – បលិពោធសីសញ្ច តណ្ហា, វិនិពន្ធនសីសញ្ច មានោ, បរាមាសសីសញ្ច ទិដ្ឋិ, វិក្ខេបសីសញ្ច ឧទ្ធច្ចំ, សំកិលេសសីសញ្ច អវិជ្ជា, អធិមោក្ខសីសញ្ច សទ្ធា, បគ្គហសីសញ្ច វីរិយំ, ឧបដ្ឋានសីសញ្ច សតិ, អវិក្ខេបសីសញ្ច សមាធិ, ទស្សនសីសញ្ច បញ្ញា, បវត្តសីសញ្ច ជីវិតិន្ទ្រិយំ, គោចរសីសញ្ច វិមោក្ខោ, សង្ខារសីសញ្ច និរោធោ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘សព្ពធម្មានំ សម្មា សមុច្ឆេទេ និរោធេ ច អនុបដ្ឋានតា បញ្ញា សមសីសដ្ឋេ ញាណំ’’.

សមសីសដ្ឋញាណនិទ្ទេសោ ឆត្តិំសតិមោ.