៣៣. អរណវិហារញាណនិទ្ទេសោ

៨២. កថំ ទស្សនាធិបតេយ្យំ សន្តោ ច វិហារាធិគមោ បណីតាធិមុត្តតា បញ្ញា អរណវិហារេ ញាណំ? ទស្សនាធិបតេយ្យន្តិ អនិច្ចានុបស្សនា ទស្សនាធិបតេយ្យំ, ទុក្ខានុបស្សនា ទស្សនាធិបតេយ្យំ, អនត្តានុបស្សនា ទស្សនាធិបតេយ្យំ, រូបេ អនិច្ចានុបស្សនា ទស្សនាធិបតេយ្យំ, រូបេ ទុក្ខានុបស្សនា ទស្សនាធិបតេយ្យំ, រូបេ អនត្តានុបស្សនា ទស្សនាធិបតេយ្យំ; វេទនាយ…បេ… សញ្ញាយ… សង្ខារេសុ… វិញ្ញាណេ… ចក្ខុស្មិំ…បេ… ជរាមរណេ អនិច្ចានុបស្សនា ទស្សនាធិបតេយ្យំ, ជរាមរណេ ទុក្ខានុបស្សនា ទស្សនាធិបតេយ្យំ, ជរាមរណេ អនត្តានុបស្សនា ទស្សនាធិបតេយ្យំ.

សន្តោ ច វិហារាធិគមោតិ សុញ្ញតោ វិហារោ សន្តោ វិហារាធិគមោ. អនិមិត្តោ វិហារោ សន្តោ វិហារាធិគមោ. អប្បណិហិតោ វិហារោ សន្តោ វិហារាធិគមោ.

បណីតាធិមុត្តតាតិ សុញ្ញតេ អធិមុត្តតា បណីតាធិមុត្តតា. អនិមិត្តេ អធិមុត្តតា បណីតាធិមុត្តតា. អប្បណិហិតេ អធិមុត្តតា បណីតាធិមុត្តតា.

អរណវិហារោតិ បឋមំ ឈានំ អរណវិហារោ. ទុតិយំ ឈានំ អរណវិហារោ. តតិយំ ឈានំ អរណវិហារោ. ចតុត្ថំ ឈានំ អរណវិហារោ. អាកាសានញ្ចាយតនសមាបត្តិ អរណវិហារោ…បេ… នេវសញ្ញានាសញ្ញាយតនសមាបត្តិ អរណវិហារោ.

អរណវិហារោតិ កេនដ្ឋេន អរណវិហារោ? បឋមេន ឈានេន នីវរណេ ហរតីតិ – អរណវិហារោ. ទុតិយេន ឈានេន វិតក្កវិចារេ ហរតីតិ – អរណវិហារោ. តតិយេន ឈានេន បីតិំ ហរតីតិ – អរណវិហារោ. ចតុត្ថេន ឈានេន សុខទុក្ខេ ហរតីតិ – អរណវិហារោ. អាកាសានញ្ចាយតនសមាបត្តិយា រូបសញ្ញំ បដិឃសញ្ញំ នានត្តសញ្ញំ ហរតីតិ – អរណវិហារោ. វិញ្ញាណញ្ចាយតនសមាបត្តិយា អាកាសានញ្ចាយតនសញ្ញំ ហរតីតិ – អរណវិហារោ. អាកិញ្ចញ្ញាយតនសមាបត្តិយា វិញ្ញាណញ្ចាយតនសញ្ញំ ហរតីតិ – អរណវិហារោ. នេវសញ្ញានាសញ្ញាយតនសមាបត្តិយា អាកិញ្ចញ្ញាយតនសញ្ញំ ហរតីតិ – អរណវិហារោ. អយំ អរណវិហារោ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘ទស្សនាធិបតេយ្យំ សន្តោ ច វិហារាធិគមោ បណីតាធិមុត្តតា បញ្ញា អរណវិហារេ ញាណំ’’.

អរណវិហារញាណនិទ្ទេសោ តេត្តិំសតិមោ.