២៥-២៨. បដិសម្ភិទាញាណនិទ្ទេសោ

៧៦. កថំ អត្ថនានត្តេ បញ្ញា អត្ថបដិសម្ភិទេ ញាណំ, ធម្មនានត្តេ បញ្ញា ធម្មបដិសម្ភិទេ ញាណំ, និរុត្តិនានត្តេ បញ្ញា និរុត្តិបដិសម្ភិទេ ញាណំ, បដិភាននានត្តេ បញ្ញា បដិភានបដិសម្ភិទេ ញាណំ? សទ្ធិន្ទ្រិយំ ធម្មោ, វីរិយិន្ទ្រិយំ ធម្មោ, សតិន្ទ្រិយំ ធម្មោ, សមាធិន្ទ្រិយំ ធម្មោ, បញ្ញិន្ទ្រិយំ ធម្មោ. អញ្ញោ សទ្ធិន្ទ្រិយំ ធម្មោ, អញ្ញោ វីរិយិន្ទ្រិយំ ធម្មោ, អញ្ញោ សតិន្ទ្រិយំ ធម្មោ, អញ្ញោ សមាធិន្ទ្រិយំ ធម្មោ, អញ្ញោ បញ្ញិន្ទ្រិយំ ធម្មោ. យេន ញាណេន ឥមេ នានា ធម្មា ញាតា, តេនេវ ញាណេន ឥមេ នានា ធម្មា បដិវិទិតាតិ. តេន វុច្ចតិ – ‘‘ធម្មនានត្តេ បញ្ញា ធម្មបដិសម្ភិទេ ញាណំ’’.

អធិមោក្ខដ្ឋោ អត្ថោ, បគ្គហដ្ឋោ អត្ថោ, ឧបដ្ឋានដ្ឋោ អត្ថោ, អវិក្ខេបដ្ឋោ អត្ថោ, ទស្សនដ្ឋោ អត្ថោ. អញ្ញោ អធិមោក្ខដ្ឋោ អត្ថោ, អញ្ញោ បគ្គហដ្ឋោ អត្ថោ, អញ្ញោ ឧបដ្ឋានដ្ឋោ អត្ថោ, អញ្ញោ អវិក្ខេបដ្ឋោ អត្ថោ, អញ្ញោ ទស្សនដ្ឋោ អត្ថោ. យេន ញាណេន ឥមេ នានា អត្ថា ញាតា, តេនេវ ញាណេន ឥមេ នានា អត្ថា បដិវិទិតាតិ. តេន វុច្ចតិ ‘‘អត្ថនានត្តេ បញ្ញា អត្ថបដិសម្ភិទេ ញាណំ’’.

បញ្ច ធម្មេ សន្ទស្សេតុំ ព្យញ្ជននិរុត្តាភិលាបា, បញ្ច អត្ថេ សន្ទស្សេតុំ ព្យញ្ជននិរុត្តាភិលាបា. អញ្ញា ធម្មនិរុត្តិយោ, អញ្ញា អត្ថនិរុត្តិយោ. យេន ញាណេន ឥមា នានា និរុត្តិយោ ញាតា, តេនេវ ញាណេន ឥមា នានា និរុត្តិយោ បដិវិទិតាតិ. តេន វុច្ចតិ – ‘‘និរុត្តិនានត្តេ បញ្ញា និរុត្តិបដិសម្ភិទេ ញាណំ’’.

បញ្ចសុ ធម្មេសុ ញាណានិ, បញ្ចសុ អត្ថេសុ ញាណានិ, ទសសុ និរុត្តីសុ ញាណានិ. អញ្ញានិ ធម្មេសុ ញាណានិ, អញ្ញានិ អត្ថេសុ ញាណានិ, អញ្ញានិ និរុត្តីសុ ញាណានិ. យេន ញាណេន ឥមេ នានា ញាណា ញាតា, តេនេវ ញាណេន ឥមេ នានា ញាណា បដិវិទិតាតិ. តេន វុច្ចតិ – ‘‘បដិភាននានត្តេ បញ្ញា បដិភានបដិសម្ភិទេ ញាណំ’’.

៧៧. សទ្ធាពលំ ធម្មោ, វីរិយពលំ ធម្មោ, សតិពលំ ធម្មោ, សមាធិពលំ ធម្មោ, បញ្ញាពលំ ធម្មោ. អញ្ញោ សទ្ធាពលំ ធម្មោ, អញ្ញោ វីរិយពលំ ធម្មោ, អញ្ញោ សតិពលំ ធម្មោ, អញ្ញោ សមាធិពលំ ធម្មោ, អញ្ញោ បញ្ញាពលំ ធម្មោ. យេន ញាណេន ឥមេ នានា ធម្មា ញាតា, តេនេវ ញាណេន ឥមេ នានា ធម្មា បដិវិទិតាតិ. តេន វុច្ចតិ – ‘‘ធម្មនានត្តេ បញ្ញា ធម្មបដិសម្ភិទេ ញាណំ’’.

អស្សទ្ធិយេ អកម្បិយដ្ឋោ អត្ថោ. កោសជ្ជេ អកម្បិយដ្ឋោ អត្ថោ. បមាទេ អកម្បិយដ្ឋោ អត្ថោ. ឧទ្ធច្ចេ អកម្បិយដ្ឋោ អត្ថោ. អវិជ្ជាយ អកម្បិយដ្ឋោ អត្ថោ. អញ្ញោ អស្សទ្ធិយេ អកម្បិយដ្ឋោ អត្ថោ, អញ្ញោ កោសជ្ជេ អកម្បិយដ្ឋោ អត្ថោ, អញ្ញោ បមាទេ អកម្បិយដ្ឋោ អត្ថោ, អញ្ញោ ឧទ្ធច្ចេ អកម្បិយដ្ឋោ អត្ថោ, អញ្ញោ អវិជ្ជាយ អកម្បិយដ្ឋោ អត្ថោ. យេន ញាណេន ឥមេ នានា អត្ថា ញាតា, តេនេវ ញាណេន ឥមេ នានា អត្ថា បដិវិទិតាតិ. តេន វុច្ចតិ – ‘‘អត្ថនានត្តេ បញ្ញា អត្ថបដិសម្ភិទេ ញាណំ’’.

បញ្ច ធម្មេ សន្ទស្សេតុំ ព្យញ្ជននិរុត្តាភិលាបា, បញ្ច អត្ថេ សន្ទស្សេតុំ ព្យញ្ជននិរុត្តាភិលាបា. អញ្ញា ធម្មនិរុត្តិយោ, អញ្ញា អត្ថនិរុត្តិយោ. យេន ញាណេន ឥមា នានា និរុត្តិយោ ញាតា, តេនេវ ញាណេន ឥមា នានា និរុត្តិយោ បដិវិទិតាតិ. តេន វុច្ចតិ – ‘‘និរុត្តិនានត្តេ បញ្ញា និរុត្តិបដិសម្ភិទេ ញាណំ’’.

បញ្ចសុ [បញ្ច (?)] ធម្មេសុ ញាណានិ, បញ្ចសុ [បញ្ច (?)] អត្ថេសុ ញាណានិ, ទសសុ [ទស (?)] និរុត្តីសុ ញាណានិ. អញ្ញានិ ធម្មេសុ ញាណានិ, អញ្ញានិ អត្ថេសុ ញាណានិ, អញ្ញានិ និរុត្តីសុ ញាណានិ. យេន ញាណេន ឥមេ នានា ញាណា ញាតា, តេនេវ ញាណេន ឥមេ នានា ញាណា បដិវិទិតាតិ. តេន វុច្ចតិ – ‘‘បដិភាននានត្តេ បញ្ញា បដិភានបដិសម្ភិទេ ញាណំ’’.

សតិសម្ពោជ្ឈង្គោ ធម្មោ, ធម្មវិចយសម្ពោជ្ឈង្គោ ធម្មោ, វីរិយសម្ពោជ្ឈង្គោ ធម្មោ, បីតិសម្ពោជ្ឈង្គោ ធម្មោ, បស្សទ្ធិសម្ពោជ្ឈង្គោ ធម្មោ, សមាធិសម្ពោជ្ឈង្គោ ធម្មោ, ឧបេក្ខាសម្ពោជ្ឈង្គោ ធម្មោ. អញ្ញោ សតិសម្ពោជ្ឈង្គោ ធម្មោ, អញ្ញោ ធម្មវិចយសម្ពោជ្ឈង្គោ ធម្មោ, អញ្ញោ វីរិយសម្ពោជ្ឈង្គោ ធម្មោ, អញ្ញោ បីតិសម្ពោជ្ឈង្គោ ធម្មោ, អញ្ញោ បស្សទ្ធិសម្ពោជ្ឈង្គោ ធម្មោ, អញ្ញោ សមាធិសម្ពោជ្ឈង្គោ ធម្មោ, អញ្ញោ ឧបេក្ខាសម្ពោជ្ឈង្គោ ធម្មោ. យេន ញាណេន ឥមេ នានា ធម្មា ញាតា, តេនេវ ញាណេន ឥមេ នានា ធម្មា បដិវិទិតាតិ. តេន វុច្ចតិ – ‘‘ធម្មនានត្តេ បញ្ញា ធម្មបដិសម្ភិទេ ញាណំ’’.

ឧបដ្ឋានដ្ឋោ អត្ថោ, បវិចយដ្ឋោ អត្ថោ, បគ្គហដ្ឋោ អត្ថោ, ផរណដ្ឋោ អត្ថោ, ឧបសមដ្ឋោ អត្ថោ, អវិក្ខេបដ្ឋោ អត្ថោ, បដិសង្ខានដ្ឋោ អត្ថោ. អញ្ញោ ឧបដ្ឋានដ្ឋោ អត្ថោ, អញ្ញោ បវិចយដ្ឋោ អត្ថោ, អញ្ញោ បគ្គហដ្ឋោ អត្ថោ, អញ្ញោ ផរណដ្ឋោ អត្ថោ, អញ្ញោ ឧបសមដ្ឋោ អត្ថោ, អញ្ញោ អវិក្ខេបដ្ឋោ អត្ថោ, អញ្ញោ បដិសង្ខានដ្ឋោ អត្ថោ. យេន ញាណេន ឥមេ នានា អត្ថា ញាតា, តេនេវ ញាណេន ឥមេ នានា អត្ថា បដិវិទិតាតិ. តេន វុច្ចតិ – ‘‘អត្ថនានត្តេ បញ្ញា អត្ថបដិសម្ភិទេ ញាណំ’’.

សត្ត ធម្មេ សន្ទស្សេតុំ ព្យញ្ជននិរុត្តាភិលាបា, សត្ត អត្ថេ សន្ទស្សេតុំ ព្យញ្ជននិរុត្តាភិលាបា. អញ្ញា ធម្មនិរុត្តិយោ, អញ្ញា អត្ថនិរុត្តិយោ. យេន ញាណេន ឥមា នានា និរុត្តិយោ ញាតា, តេនេវ ញាណេន ឥមា នានា និរុត្តិយោ បដិវិទិតាតិ. តេន វុច្ចតិ – ‘‘និរុត្តិនានត្តេ បញ្ញា និរុត្តិបដិសម្ភិទេ ញាណំ’’.

សត្តសុ ធម្មេសុ ញាណានិ, សត្តសុ អត្ថេសុ ញាណានិ, ចុទ្ទសសុ និរុត្តីសុ ញាណានិ. អញ្ញានិ ធម្មេសុ ញាណានិ, អញ្ញានិ អត្ថេសុ ញាណានិ, អញ្ញានិ និរុត្តីសុ ញាណានិ. យេន ញាណេន ឥមេ នានា ញាណា ញាតា, តេនេវ ញាណេន ឥមេ នានា ញាណា បដិវិទិតាតិ. តេន វុច្ចតិ – ‘‘បដិភាននានត្តេ បញ្ញា បដិភានបដិសម្ភិទេ ញាណំ’’.

សម្មាទិដ្ឋិ ធម្មោ, សម្មាសង្កប្បោ ធម្មោ, សម្មាវាចា ធម្មោ, សម្មាកម្មន្តោ ធម្មោ, សម្មាអាជីវោ ធម្មោ, សម្មាវាយាមោ ធម្មោ, សម្មាសតិ ធម្មោ, សម្មាសមាធិ ធម្មោ. អញ្ញោ សម្មាទិដ្ឋិ ធម្មោ, អញ្ញោ សម្មាសង្កប្បោ ធម្មោ, អញ្ញោ សម្មាវាចា ធម្មោ, អញ្ញោ សម្មាកម្មន្តោ ធម្មោ, អញ្ញោ សម្មាអាជីវោ ធម្មោ, អញ្ញោ សម្មាវាយាមោ ធម្មោ, អញ្ញោ សម្មាសតិ ធម្មោ, អញ្ញោ សម្មាសមាធិ ធម្មោ. យេន ញាណេន ឥមេ នានា ធម្មា ញាតា, តេនេវ ញាណេន ឥមេ នានា ធម្មា បដិវិទិតាតិ. តេន វុច្ចតិ – ‘‘ធម្មនានត្តេ បញ្ញា ធម្មបដិសម្ភិទេ ញាណំ’’.

ទស្សនដ្ឋោ អត្ថោ, អភិនិរោបនដ្ឋោ អត្ថោ, បរិគ្គហដ្ឋោ អត្ថោ, សមុដ្ឋានដ្ឋោ អត្ថោ, វោទានដ្ឋោ អត្ថោ, បគ្គហដ្ឋោ អត្ថោ, ឧបដ្ឋានដ្ឋោ អត្ថោ, អវិក្ខេបដ្ឋោ អត្ថោ. អញ្ញោ ទស្សនដ្ឋោ អត្ថោ, អញ្ញោ អភិនិរោបនដ្ឋោ អត្ថោ, អញ្ញោ បរិគ្គហដ្ឋោ អត្ថោ, អញ្ញោ សមុដ្ឋានដ្ឋោ អត្ថោ, អញ្ញោ វោទានដ្ឋោ អត្ថោ, អញ្ញោ បគ្គហដ្ឋោ អត្ថោ, អញ្ញោ ឧបដ្ឋានដ្ឋោ អត្ថោ, អញ្ញោ អវិក្ខេបដ្ឋោ អត្ថោ. យេន ញាណេន ឥមេ នានា អត្ថា ញាតា តេនេវ ញាណេន ឥមេ នានា អត្ថា បដិវិទិតាតិ. តេន វុច្ចតិ – ‘‘អត្ថនានត្តេ បញ្ញា អត្ថបដិសម្ភិទេ ញាណំ’’.

អដ្ឋ ធម្មេ សន្ទស្សេតុំ ព្យញ្ជននិរុត្តាភិលាបា, អដ្ឋ អត្ថេ សន្ទស្សេតុំ ព្យញ្ជននិរុត្តាភិលាបា. អញ្ញា ធម្មនិរុត្តិយោ, អញ្ញា អត្ថនិរុត្តិយោ. យេន ញាណេន ឥមា នានា និរុត្តិយោ ញាតា, តេនេវ ញាណេន ឥមា នានា និរុត្តិយោ បដិវិទិតាតិ. តេន វុច្ចតិ – ‘‘និរុត្តិនានត្តេ បញ្ញា និរុត្តិបដិសម្ភិទេ ញាណំ’’.

អដ្ឋសុ ធម្មេសុ ញាណានិ, អដ្ឋសុ អត្ថេសុ ញាណានិ សោឡសសុ និរុត្តីសុ ញាណានិ. អញ្ញានិ ធម្មេសុ ញាណានិ, អញ្ញានិ អត្ថេសុ ញាណានិ, អញ្ញានិ និរុត្តីសុ ញាណានិ. យេន ញាណេន ឥមេ នានា ញាណា ញាតា, តេនេវ ញាណេន ឥមេ នានា ញាណា បដិវិទិតាតិ. តេន វុច្ចតិ – ‘‘បដិភាននានត្តេ បញ្ញា បដិភានបដិសម្ភិទេ ញាណំ’’. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘អត្ថនានត្តេ បញ្ញា អត្ថបដិសម្ភិទេ ញាណំ. ធម្មនានត្តេ បញ្ញា ធម្មបដិសម្ភិទេ ញាណំ. និរុត្តិនានត្តេ បញ្ញា និរុត្តិបដិសម្ភិទេ ញាណំ. បដិភាននានត្តេ បញ្ញា បដិភានបដិសម្ភិទេ ញាណំ’’.

បដិសម្ភិទាញាណនិទ្ទេសោ អដ្ឋវីសតិមោ.