២០-២៤. ញាណបញ្ចកនិទ្ទេសោ

៧៥. កថំ អភិញ្ញាបញ្ញា ញាតដ្ឋេ ញាណំ, បរិញ្ញាបញ្ញា តីរណដ្ឋេ ញាណំ, បហានេបញ្ញា បរិច្ចាគដ្ឋេ ញាណំ, ភាវនា បញ្ញា ឯករសដ្ឋេ ញាណំ, សច្ឆិកិរិយាបញ្ញា ផស្សនដ្ឋេ ញាណំ? យេ យេ ធម្មា អភិញ្ញាតា ហោន្តិ, តេ តេ ធម្មា ញាតា ហោន្តិ. យេ យេ ធម្មា បរិញ្ញាតា ហោន្តិ, តេ តេ ធម្មា តីរិតា ហោន្តិ. យេ យេ ធម្មា បហីនា ហោន្តិ, តេ តេ ធម្មា បរិច្ចត្តា ហោន្តិ. យេ យេ ធម្មា ភាវិតា ហោន្តិ, តេ តេ ធម្មា ឯករសា ហោន្តិ. យេ យេ ធម្មា សច្ឆិកតា ហោន្តិ, តេ តេ ធម្មា ផស្សិតា ហោន្តិ. តំ ញាតដ្ឋេន ញាណំ, បជាននដ្ឋេន បញ្ញា. តេន វុច្ចតិ – ‘‘អភិញ្ញា បញ្ញា ញាតដ្ឋេ ញាណំ, បរិញ្ញា បញ្ញា តីរណដ្ឋេ ញាណំ, បហានេ បញ្ញា បរិច្ចាគដ្ឋេ ញាណំ, ភាវនា បញ្ញា ឯករសដ្ឋេ ញាណំ, សច្ឆិកិរិយា បញ្ញា ផុសនដ្ឋេ ញាណំ’’.

ញាណបញ្ចកនិទ្ទេសោ ចតុវីសតិមោ.