១៤. អធិដ្ឋានហារសម្បាតោ

៧៦. តត្ថ កតមោ អធិដ្ឋានោ ហារសម្បាតោ?

តស្មា រក្ខិតចិត្តស្ស, សម្មាសង្កប្បគោចរោតិ គាថា. តស្មា រក្ខិតចិត្តស្សាតិ ឯកត្តតា. ចិត្តំ មនោ វិញ្ញាណំ, អយំ វេមត្តតា. សម្មាសង្កប្បគោចរោតិ ឯកត្តតា. នេក្ខម្មសង្កប្បោ អព្យាបាទសង្កប្បោ អវិហិំសាសង្កប្បោ អយំ វេមត្តតា. សម្មាទិដ្ឋិបុរេក្ខារោតិ ឯកត្តតា. សម្មាទិដ្ឋិ នាម យំ ទុក្ខេ ញាណំ ទុក្ខសមុទយេ ញាណំ ទុក្ខនិរោធេ ញាណំ ទុក្ខនិរោធគាមិនិយា បដិបទាយ ញាណំ មគ្គេ ញាណំ ហេតុម្ហិ ញាណំ ហេតុសមុប្បន្នេសុ ធម្មេសុ ញាណំ បច្ចយេ ញាណំ បច្ចយសមុប្បន្នេសុ ធម្មេសុ ញាណំ, យំ តត្ថ តត្ថ យថាភូតំ ញាណទស្សនំ អភិសមយោ សម្បដិវេធោ សច្ចាគមនំ, អយំ វេមត្តតា. ញត្វាន ឧទយព្ពយន្តិ ឯកត្តតា, ឧទយេន អវិជ្ជាបច្ចយា សង្ខារា, សង្ខារបច្ចយា វិញ្ញាណំ, ឯវំ សព្ពំ សមុទយោ ភវតិ. វយេន អវិជ្ជានិរោធា សង្ខារនិរោធោ, ឯវំ សព្ពំ និរោធោ ហោតិ, អយំ វេមត្តតា. ថិនមិទ្ធាភិភូ ភិក្ខូតិ ឯកត្តតា, ថិនំ នាម យា ចិត្តស្ស អកល្លតា អកម្មនិយតា, មិទ្ធំ នាម យំ កាយស្ស លីនត្តំ, អយំ វេមត្តតា. សព្ពា ទុគ្គតិយោ ជហេតិ ឯកត្តតា, ទេវមនុស្សេ វា ឧបនិធាយ អបាយា ទុគ្គតិ, និព្ពានំ វា ឧបនិធាយ សព្ពា ឧបបត្តិយោ ទុគ្គតិ, អយំ វេមត្តតា.

និយុត្តោ អធិដ្ឋានោ ហារសម្បាតោ.