៣. យុត្តិហារសម្បាតោ

៦៥. តត្ថ កតមោ យុត្តិហារសម្បាតោ?

‘‘តស្មា រក្ខិតចិត្តស្ស, សម្មាសង្កប្បគោចរោ;

សម្មាទិដ្ឋិបុរេក្ខារោ, ញត្វាន ឧទយព្ពយំ;

ថិនមិទ្ធាភិភូ ភិក្ខុ, សព្ពា ទុគ្គតិយោ ជហេ’’តិ.

‘‘តស្មា រក្ខិតចិត្តស្ស, សម្មាសង្កប្បគោចរោ’’តិ រក្ខិតចិត្តស្ស សម្មាសង្កប្បគោចរោ ភវិស្សតីតិ យុជ្ជតិ, សម្មាសង្កប្បគោចរោ សម្មាទិដ្ឋិ ភវិស្សតីតិ យុជ្ជតិ, សម្មាទិដ្ឋិបុរេក្ខារោ វិហរន្តោ ឧទយព្ពយំ បដិវិជ្ឈិស្សតីតិ យុជ្ជតិ, ឧទយព្ពយំ បដិវិជ្ឈន្តោ សព្ពា ទុគ្គតិយោ ជហិស្សតីតិ យុជ្ជតិ. សព្ពា ទុគ្គតិយោ ជហន្តោ សព្ពានិ ទុគ្គតិវិនិបាតភយានិ សមតិក្កមិស្សតីតិ យុជ្ជតីតិ.

និយុត្តោ យុត្តិហារសម្បាតោ.