២. តិស្សមេត្តេយ្យមាណវបុច្ឆា

៦៥. ‘‘កោធ សន្តុសិតោ លោកេ, [ឥច្ចាយស្មា តិស្សមេត្តេយ្យោ]

កស្ស នោ សន្តិ ឥញ្ជិតា;

កោ ឧភន្តមភិញ្ញាយ, មជ្ឈេ មន្តា ន លិប្បតិ [ន បិម្បតិ (ពហូសុ)];

កំ ព្រូសិ មហាបុរិសោតិ, កោ ឥធ សិព្ពិនិមច្ចគា’’តិ [សិព្ពនិមច្ចគា (សី. ស្យា.)].

៦៦. ‘‘កាមេសុ ព្រហ្មចរិយវា, [មេត្តេយ្យាតិ ភគវា]

វីតតណ្ហោ សទា សតោ;

សង្ខាយ និព្ពុតោ ភិក្ខុ, តស្ស នោ សន្តិ ឥញ្ជិតា.

៦៧. ‘‘សោ ឧភន្តមភិញ្ញាយ, មជ្ឈេ មន្តា ន លិប្បតិ;

តំ ព្រូមិ មហាបុរិសោតិ, សោ ឥធ សិព្ពិនិមច្ចគា’’តិ.

តិស្សមេត្តេយ្យមាណវបុច្ឆា ទុតិយា.