១៨. បារាយនានុគីតិគាថា

១៥៦. ‘‘បារាយនមនុគាយិស្សំ, [ឥច្ចាយស្មា បិង្គិយោ]

យថាទ្ទក្ខិ តថាក្ខាសិ, វិមលោ ភូរិមេធសោ;

និក្កាមោ និព្ពនោ [និព្ពុតោ (ស្យា.)] នាគោ, កិស្ស ហេតុ មុសា ភណេ.

១៥៧. ‘‘បហីនមលមោហស្ស, មានមក្ខប្បហាយិនោ;

ហន្ទាហំ កិត្តយិស្សាមិ, គិរំ វណ្ណូបសញ្ហិតំ.

១៥៨. ‘‘តមោនុទោ ពុទ្ធោ សមន្តចក្ខុ, លោកន្តគូ សព្ពភវាតិវត្តោ;

អនាសវោ សព្ពទុក្ខប្បហីនោ, សច្ចវ្ហយោ ព្រហ្មេ ឧបាសិតោ មេ.

១៥៩. ‘‘ទិជោ យថា កុព្ពនកំ បហាយ, ពហុប្ផលំ កាននមាវសេយ្យ;

ឯវម្បហំ អប្បទស្សេ បហាយ, មហោទធិំ ហំសោរិវ អជ្ឈបត្តោ.

១៦០. ‘‘យេមេ បុព្ពេ វិយាកំសុ, ហុរំ គោតមសាសនា;

ឥច្ចាសិ ឥតិ ភវិស្សតិ;

សព្ពំ តំ ឥតិហីតិហំ, សព្ពំ តំ តក្កវឌ្ឍនំ.

១៦១. ‘‘ឯកោ តមនុទាសិនោ, ជុតិមា សោ បភង្ករោ;

គោតមោ ភូរិបញ្ញាណោ, គោតមោ ភូរិមេធសោ.

១៦២. ‘‘យោ មេ ធម្មមទេសេសិ, សន្ទិដ្ឋិកមកាលិកំ;

តណ្ហក្ខយមនីតិកំ, យស្ស នត្ថិ ឧបមា ក្វចិ’’.

១៦៣. ‘‘កិំ នុ តម្ហា វិប្បវសសិ, មុហុត្តមបិ បិង្គិយ;

គោតមា ភូរិបញ្ញាណា, គោតមា ភូរិមេធសា.

១៦៤. ‘‘យោ តេ ធម្មមទេសេសិ, សន្ទិដ្ឋិកមកាលិកំ;

តណ្ហក្ខយមនីតិកំ, យស្ស នត្ថិ ឧបមា ក្វចិ’’.

១៦៥. ‘‘នាហំ តម្ហា វិប្បវសាមិ, មុហុត្តមបិ ព្រាហ្មណ;

គោតមា ភូរិបញ្ញាណា, គោតមា ភូរិមេធសា.

១៦៦. ‘‘យោ មេ ធម្មមទេសេសិ, សន្ទិដ្ឋិកមកាលិកំ;

តណ្ហក្ខយមនីតិកំ, យស្ស នត្ថិ ឧបមា ក្វចិ.

១៦៧. ‘‘បស្សាមិ នំ មនសា ចក្ខុនាវ, រត្តិន្ទិវំ ព្រាហ្មណ អប្បមត្តោ.

នមស្សមានោ វិវសេមិ រត្តិំ, តេនេវ មញ្ញាមិ អវិប្បវាសំ.

១៦៨. ‘‘សទ្ធា ច បីតិ ច មនោ សតិ ច,

នាបេន្តិមេ គោតមសាសនម្ហា;

យំ យំ ទិសំ វជតិ ភូរិបញ្ញោ, ស តេន តេនេវ នតោហមស្មិ.

១៦៩. ‘‘ជិណ្ណស្ស មេ ទុព្ពលថាមកស្ស, តេនេវ កាយោ ន បលេតិ តត្ថ;

សង្កប្បយន្តាយ [សំកប្បយត្តាយ (សី.)] វជាមិ និច្ចំ, មនោ ហិ មេ ព្រាហ្មណ តេន យុត្តោ.

១៧០. ‘‘បង្កេ សយានោ បរិផន្ទមានោ, ទីបា ទីបំ ឧបល្លវិំ;

អថទ្ទសាសិំ សម្ពុទ្ធំ, ឱឃតិណ្ណមនាសវំ.

១៧១. ‘‘យថា អហូ វក្កលិ មុត្តសទ្ធោ, ភទ្រាវុធោ អាឡវិគោតមោ ច;

ឯវមេវ ត្វម្បិ បមុញ្ចស្សុ សទ្ធំ, គមិស្សសិ ត្វំ បិង្គិយ មច្ចុធេយ្យស្ស បារំ’’ [មច្ចុធេយ្យបារំ (សី.)].

១៧២. ‘‘ឯស ភិយ្យោ បសីទាមិ, សុត្វាន មុនិនោ វចោ;

វិវដ្ដច្ឆទោ សម្ពុទ្ធោ, អខិលោ បដិភានវា.

១៧៣. ‘‘អធិទេវេ អភិញ្ញាយ, សព្ពំ វេទិ បរោបរំ;

បញ្ហានន្តករោ សត្ថា, កង្ខីនំ បដិជានតំ.

១៧៤. ‘‘អសំហីរំ អសំកុប្បំ, យស្ស នត្ថិ ឧបមា ក្វចិ;

អទ្ធា គមិស្សាមិ ន មេត្ថ កង្ខា, ឯវំ មំ ធារេហិ អធិមុត្តចិត្ត’’ន្តិ [អជិតមាណវបុច្ឆាយ បដ្ឋាយ យាវបារាយនានុគីតិគាតាបរិយោសានា ស្យា. … បោត្ថកេ នត្ថិ].

បារាយនានុគីតិគាថា និដ្ឋិតា.