១៤. បោសាលមាណវបុច្ឆា

១៣៧. ‘‘យោ អតីតំ អាទិសតិ, [ឥច្ចាយស្មា បោសាលោ]

អនេជោ ឆិន្នសំសយោ;

បារគុំ សព្ពធម្មានំ, អត្ថិ បញ្ហេន អាគមំ.

១៣៨. ‘‘វិភូតរូបសញ្ញិស្ស, សព្ពកាយប្បហាយិនោ;

អជ្ឈត្តញ្ច ពហិទ្ធា ច, នត្ថិ កិញ្ចីតិ បស្សតោ;

ញាណំ សក្កានុបុច្ឆាមិ, កថំ នេយ្យោ តថាវិធោ’’.

១៣៩. ‘‘វិញ្ញាណដ្ឋិតិយោ សព្ពា, [បោសាលាតិ ភគវា]

អភិជានំ តថាគតោ;

តិដ្ឋន្តមេនំ ជានាតិ, វិមុត្តំ តប្បរាយណំ.

១៤០. ‘‘អាកិញ្ចញ្ញសម្ភវំ ញត្វា, នន្ទី សំយោជនំ ឥតិ;

ឯវមេតំ អភិញ្ញាយ, តតោ តត្ថ វិបស្សតិ;

ឯតំ [ឯវំ (ស្យា. ក.)] ញាណំ តថំ តស្ស, ព្រាហ្មណស្ស វុសីមតោ’’តិ.

បោសាលមាណវបុច្ឆា ចុទ្ទសមា.