៣៨១. មិគាលោបជាតកំ (៦-១-៦)

៣៤. ន មេ រុច្ចិ មិគាលោប, យស្ស តេ តាទិសី គតី;

អតុច្ចំ តាត បតសិ, អភូមិំ តាត សេវសិ.

៣៥. ចតុក្កណ្ណំវ កេទារំ, យទា តេ បថវី សិយា;

តតោ តាត និវត្តស្សុ, មាស្សុ ឯត្តោ បរំ គមិ.

៣៦. សន្តិ អញ្ញេបិ សកុណា, បត្តយានា វិហង្គមា;

អក្ខិត្តា វាតវេគេន, នដ្ឋា តេ សស្សតីសមា.

៣៧. អកត្វា អបនន្ទស្ស [អបរណ្ណស្ស (សី. ស្យា. បី.)], បិតុ វុទ្ធស្ស សាសនំ;

កាលវាតេ អតិក្កម្ម, វេរម្ភានំ វសំ អគា [គតោ (សី.)].

៣៨. តស្ស បុត្តា ច ទារា ច, យេ ចញ្ញេ អនុជីវិនោ;

សព្ពេ ព្យសនមាបាទុំ, អនោវាទករេ ទិជេ.

៣៩. ឯវម្បិ ឥធ វុទ្ធានំ, យោ វាក្យំ នាវពុជ្ឈតិ;

អតិសីមចរោ [អតិសីមំ ចរោ (សី. ស្យា. ក.)] ទិត្តោ, គិជ្ឈោវាតីតសាសនោ;

សព្ពេ ព្យសនំ បប្បោន្តិ, អកត្វា ពុទ្ធសាសនន្តិ.

មិគាលោបជាតកំ ឆដ្ឋំ.