៣៦៩. មិត្តវិន្ទកជាតកំ (៥-២-៩)

១០០. ក្យាហំ ទេវានមករំ, កិំ បាបំ បកតំ មយា;

យំ មេ សិរស្មិំ ឱហច្ច [ឧហច្ច (ក.), ឧហច្ច (បី.)], ចក្កំ ភមតិ មត្ថកេ.

១០១. អតិក្កម្ម រមណកំ, សទាមត្តញ្ច ទូភកំ;

ព្រហ្មត្តរញ្ច បាសាទំ, កេនត្ថេន ឥធាគតោ.

១០២. ឥតោ ពហុតរា ភោគា, អត្រ មញ្ញេ ភវិស្សរេ;

ឥតិ ឯតាយ សញ្ញាយ, បស្ស មំ ព្យសនំ គតំ.

១០៣. ចតុព្ភិ អដ្ឋជ្ឈគមា, អដ្ឋាហិបិ ច [អដ្ឋាហិ ចាបិ (សី. ស្យា.), អដ្ឋាភិ ចាបិ (ក.)] សោឡស;

សោឡសាហិ ច ពាត្តិំស, អត្រិច្ឆំ ចក្កមាសទោ;

ឥច្ឆាហតស្ស បោសស្ស, ចក្កំ ភមតិ មត្ថកេ.

១០៤. ឧបរិវិសាលា ទុប្បូរា, ឥច្ឆា វិសដគាមិនី [ឧបរិ វិសាលំ ទុប្បូរំ, ឥច្ឆាវិសទគាមិនី (សី.)];

យេ ច តំ អនុគិជ្ឈន្តិ, តេ ហោន្តិ ចក្កធារិនោតិ.

មិត្តវិន្ទកជាតកំ នវមំ.