៣៦៦. គុម្ពិយជាតកំ (៥-២-៦)

៨៥. មធុវណ្ណំ មធុរសំ, មធុគន្ធំ វិសំ អហុ;

គុម្ពិយោ ឃាសមេសានោ, អរញ្ញេ ឱទហី វិសំ.

៨៦. មធុ ឥតិ មញ្ញមានា [មធូតិ មញ្ញមានាយ (ក.)], យេ តំ វិសមខាទិសុំ [វិសមសាយិសុំ (សី. ស្យា.)];

តេសំ តំ កដុកំ អាសិ, មរណំ តេនុបាគមុំ.

៨៧. យេ ច ខោ បដិសង្ខាយ, វិសំ តំ បរិវជ្ជយុំ;

តេ អាតុរេសុ សុខិតា, ឌយ្ហមានេសុ និព្ពុតា.

៨៨. ឯវមេវ មនុស្សេសុ, វិសំ កាមា សមោហិតា;

អាមិសំ ពន្ធនញ្ចេតំ, មច្ចុវេសោ [បច្ចុវសោ (សី. ស្យា.)] គុហាសយោ.

៨៩. ឯវមេវ ឥមេ កាមេ, អាតុរា បរិចារិកេ [បរិចារកេ (ក.)];

យេ សទា បរិវជ្ជេន្តិ, សង្គំ លោកេ ឧបច្ចគុន្តិ.

គុម្ពិយជាតកំ ឆដ្ឋំ.