៣៥៥. ឃដជាតកំ (៥-១-៥)

២៩. អញ្ញេ សោចន្តិ រោទន្តិ, អញ្ញេ អស្សុមុខា ជនា;

បសន្នមុខវណ្ណោសិ, កស្មា ឃដ [ឃត (សី. បី.)] ន សោចសិ.

៣០. នាព្ភតីតហរោ សោកោ, នានាគតសុខាវហោ;

តស្មា ធង្ក [វំក (បី.)] ន សោចាមិ, នត្ថិ សោកេ ទុតីយតា [សោកោ ទុតីយកា (ក.)].

៣១. សោចំ បណ្ឌុ កិសោ ហោតិ, ភត្តញ្ចស្ស ន រុច្ចតិ;

អមិត្តា សុមនា ហោន្តិ, សល្លវិទ្ធស្ស រុប្បតោ.

៣២. គាមេ វា យទិ វារញ្ញេ, និន្នេ វា យទិ វា ថលេ;

ឋិតំ មំ នាគមិស្សតិ, ឯវំ ទិដ្ឋបទោ អហំ.

៣៣. យស្សត្តា នាលមេកោវ, សព្ពកាមរសាហរោ;

សព្ពាបិ បថវី តស្ស, ន សុខំ អាវហិស្សតីតិ.

ឃដជាតកំ បញ្ចមំ.