៣៤៦. កេសវជាតកំ (៤-៥-៦)

១៨១. មនុស្សិន្ទំ ជហិត្វាន, សព្ពកាមសមិទ្ធិនំ;

កថំ នុ ភគវា កេសី, កប្បស្ស រមតិ អស្សមេ [រមតស្សមេ (ក.)].

១៨២. សាទូនី [សាធូនិ (ក. សី. ស្យា. ក.)] រមណីយានិ, សន្តិ វក្ខា មនោរមា;

សុភាសិតានិ កប្បស្ស, នារទ រមយន្តិ មំ.

១៨៣. សាលីនំ ឱទនំ ភុញ្ជេ, សុចិំ មំសូបសេចនំ;

កថំ សាមាកនីវារំ, អលោណំ ឆាទយន្តិ តំ.

១៨៤. សាទុំ វា [អសាទុំ (បី.)] យទិ វាសាទុំ, អប្បំ វា យទិ វា ពហុំ;

វិស្សត្ថោ យត្ថ ភុញ្ជេយ្យ, វិស្សាសបរមា រសាតិ.

កេសវជាតកំ [កេសីជាតកំ (ក.)] ឆដ្ឋំ.