៣៤៤. អម្ពជាតកំ (៤-៥-៤)

១៧៣. យោ នីលិយំ មណ្ឌយតិ, សណ្ឌាសេន វិហញ្ញតិ;

តស្ស សា វសមន្វេតុ, យា តេ អម្ពេ អវាហរិ.

១៧៤. វីសំ វា បញ្ចវីសំ [បណ្ណុវីសំ (ក. សី. បី.)] វា, ឩនតិំសំ វ ជាតិយា;

តាទិសា បតិ មា លទ្ធា [បតិំ មា លទ្ធា (បី.), បតិ មា’លត្ថ (?)], យា តេ អម្ពេ អវាហរិ.

១៧៥. ទីឃំ គច្ឆតុ អទ្ធានំ, ឯកិកា អភិសារិកា;

សង្កេតេ បតិ មា អទ្ទ [មា អទ្ទស (សី. បី.)], យា តេ អម្ពេ អវាហរិ.

១៧៦. អលង្កតា សុវសនា, មាលិនី ចន្ទនុស្សទា;

ឯកិកា សយនេ សេតុ, យា តេ អម្ពេ អវាហរីតិ.

អម្ពជាតកំ [អម្ពចោរជាតកំ (ក. សី. បី.)] ចតុត្ថំ.