៣៣៨. ថុសជាតកំ (៤-៤-៨)

១៤៩. វិទិតំ ថុសំ ឧន្ទុរានំ [ឧន្ទូរានំ (ក.)], វិទិតំ បន តណ្ឌុលំ;

ថុសំ ថុសំ [ថុសំ ថូលំ (សី.)] វិវជ្ជេត្វា, តណ្ឌុលំ បន ខាទរេ.

១៥០. យា មន្តនា អរញ្ញស្មិំ, យា ច គាមេ និកណ្ណិកា;

យញ្ចេតំ ឥតិ ចីតិ ច, ឯតម្បិ វិទិតំ មយា.

១៥១. ធម្មេន កិរ ជាតស្ស, បិតា បុត្តស្ស មក្កដោ;

ទហរស្សេវ សន្តស្ស, ទន្តេហិ ផលមច្ឆិទា.

១៥២. យមេតំ បរិសប្បសិ [បរិសព្ពេសិ (ក.)], អជកាណោវ សាសបេ;

យោបាយំ ហេដ្ឋតោ សេតិ [សេសិ (សី.)], ឯតម្បិ វិទិតំ មយាតិ.

ថុសជាតកំ អដ្ឋមំ.