៣២៣. ព្រហ្មទត្តជាតកំ (៤-៣-៣)

៨៩. ទ្វយំ យាចនកោ រាជ, ព្រហ្មទត្ត និគច្ឆតិ;

អលាភំ ធនលាភំ វា, ឯវំ ធម្មា ហិ យាចនា.

៩០. យាចនំ រោទនំ អាហុ, បញ្ចាលានំ រថេសភ;

យោ យាចនំ បច្ចក្ខាតិ, តមាហុ បដិរោទនំ.

៩១. មា មទ្ទសំសុ រោទន្តំ, បញ្ចាលា សុសមាគតា;

តុវំ វា បដិរោទន្តំ, តស្មា ឥច្ឆាមហំ រហោ.

៩២. ទទាមិ តេ ព្រាហ្មណ រោហិណីនំ, គវំ សហស្សំ សហ បុង្គវេន;

អរិយោ ហិ អរិយស្ស កថំ ន ទជ្ជា [ទជ្ជេ (សី.), ទជ្ជំ (?)], សុត្វាន គាថា តវ ធម្មយុត្តាតិ.

ព្រហ្មទត្តជាតកំ តតិយំ.