៣១១. បុចិមន្ទជាតកំ (៤-២-១)

៤១. ឧដ្ឋេហិ ចោរ កិំ សេសិ, កោ អត្ថោ សុបនេន [សុបិតេន (សី.), សុបិនេន (បី. ក.)] តេ;

មា តំ គហេសុំ [គណ្ហេយ្យុំ (ក.)] រាជានោ, គាមេ កិព្ពិសការកំ.

៤២. យំ នុ [នូន (ស្យា.)] ចោរំ គហេស្សន្តិ, គាមេ កិព្ពិសការកំ;

កិំ តត្ថ បុចិមន្ទស្ស, វនេ ជាតស្ស តិដ្ឋតោ.

៤៣. ន ត្វំ អស្សត្ថ ជានាសិ, មម ចោរស្ស ចន្តរំ;

ចោរំ គហេត្វា រាជានោ, គាមេ កិព្ពិសការកំ;

អប្បេន្តិ [អច្ចេន្តិ (ស្យា.)] និម្ពសូលស្មិំ, តស្មិំ មេ សង្កតេ មនោ.

៤៤. សង្កេយ្យ សង្កិតព្ពានិ, រក្ខេយ្យានាគតំ ភយំ;

អនាគតភយា ធីរោ, ឧភោ លោកេ អវេក្ខតីតិ.

បុចិមន្ទជាតកំ បឋមំ.