៣០៦. សុជាតជាតកំ (៤-១-៦)

២១. កិមណ្ឌកា ឥមេ ទេវ, និក្ខិត្តា កំសមល្លកេ;

ឧបលោហិតកា វគ្គូ, តំ [តេ (បី.)] មេ អក្ខាហិ បុច្ឆិតោ.

២២. យានិ បុរេ តុវំ ទេវិ, ភណ្ឌុ នន្តកវាសិនី;

ឧច្ឆង្គហត្ថា បចិនាសិ, តស្សា តេ កោលិយំ ផលំ.

២៣. ឧឌ្ឌយ្ហតេ ន រមតិ, ភោគា វិប្បជហន្តិ តំ [វិប្បជហន្តិ’មំ (?)];

តត្ថេវិមំ បដិនេថ, យត្ថ កោលំ បចិស្សតិ.

២៤. ហោន្តិ ហេតេ មហារាជ, ឥទ្ធិប្បត្តាយ [ឥទ្ធិមត្តាយ (ក.)] នារិយា;

ខម ទេវ សុជាតាយ, មាស្សា [មាសុ (ក.)] កុជ្ឈ រថេសភាតិ.

សុជាតជាតកំ ឆដ្ឋំ.